NAKIPAGTAENG ni Lot ken ti pamiliana a kadua ni Abraham idiay daga ti Canaan. Maysa nga aldaw kuna ni Abraham ken ni Lot: ‘Awan nawadwad a daga ditoy para kadagiti amin nga an-animaltayo. Pangngaasim ta agsinata.’

Nakakita ni Lot ti nagpintas a paset ti daga nga adda danumna ken adu a ruot para iti an-animalna. Isu daytoy ti Distrito ti Jordan. Gapuna inyalis ni Lot ti pamiliana ken an-animalna sadiay. Iti kamaudiananna nagtaengdan idiay siudad ti Sodoma.

Dagiti tattao idiay Sodoma ti dakesda unay. Makariribok daytoy ken ni Lot, ta isut’ nasayaat a tao. Uray ti Dios mariribokan met. Iti kamaudiananna, nagbaon ti Dios ti dua nga anghel a mamakdaar ken ni Lot a dadaelenna ti Sodoma ken ti dumna a siudad ti Gomorra gapu iti kinadakesda.

Kuna dagiti anghel ken ni Lot: ‘Darasem! Alaem ti asawam ken ti dua a babbalasangmo ket rummuarkayo ditoy!’ Ket inkibin dagiti anghel ida ken inruarda ida iti siudad. Maysa kadagiti anghel ti nagkuna: ‘Isalakanyo ti biagyo! Dikay tumaltaliaw.’

Gapuna nagtaray ni Lot ken ti babbalasangna. Saanda a timmaltaliaw. Ngem simmukir ti asawa ni Lot. Nagsardeng iti apagbiit ket timmaliaw idiay Sodoma. Ket nagbalin a teddek ti asin ti asawa ni Lot. Makitam kadi dayta iti retrato?

Ipakpakita daytoy kadatayo nga isalakan ti Dios dagitoy agtulnog kenkuana, ngem dagidiay sumukir mapukawda ti biagda.