LAWT hte shi a kun dinghku masha ni gaw, Abraham hte rau Hkanan mung hta e nga ma ai. Lani mi hta e Abraham gaw, Lawt hpe tsun ai: ‘Anhte a dusat ni a matu ndai shara gaw, gyip la ai. Anhte garan nna, nga ga. Nang lam langai mi de sa wa yang, ngai kaga lam da sa wa na,’ nga ai.

Lawt gaw dai shara makau grup yin na lamu ga hpe, mada yu dat ai. Hka mung nga ai hte, shi a du sat ni a matu, tsing du tsing mam ni law law nga nna, grai kaja ai lamu ga shara langai mi hpe mu dat ai. Dai shara gaw, Yawdan ginwang re. Dai majaw Lawt gaw shi a kun dinghku hte dusat yam nga hpung ni, dai shara de htawt sa ai. Hpang jahtumg hta Sodom mare kaw e, nta madung shatai nna, nga ma ai.

Sodom mare masha ni gaw grai nshawp ma ai. Dai rai nna, Lawt gaw myit npyaw ai. Shi gaw kaja ai masha langai mi rai nga ai majaw re. Karai Kasang mung myit npyaw ai. Hpang jahtum hta, karai Kasang gaw, lamu kasa lahkawng shangun dat nna, Sodom mare hte makau na Gomora mare hpe shanhte nshawp nkap ai majaw, jahten kau sana re nga nna, Lawt hpe sadi jaw shangun ai.

Lamu kasa ni mung Lawt hpe tsun ai; ‘Lawan rawt mu! Na a madu jan hte shayi sha lahkawng hpe, woi nna ndai shara kaw na rawt hprawng u!’ nga ai. Lawt hte shi a kun dinghku masha ni gaw myit kanung nga nna, lamu kasa ni gaw, shanhte a lata hpe dun nna, mare shinggan de woi sa ma ai. Dai shaloi e lamu kasa langai mi tsun ai gaw: ‘asak lawt hkra hprawng mu! Hpang de hkum gayin yu mu, bum de hprawng mu,’ nga nna tsun ma ai.

Lawt hte shi a shayi sha ni gaw aga madat nna Sodom mare kaw na hprawng pru ma ai. Chyahkring mi pyi nhkring ma ai. Hpang de mung n kayin yu ma ai. Raitimung Lawt a madu jan gaw aga n madat ai. Sodom mare hte ram ram tsan ai shara kaw du ai shaloi, shi wa hkring nna, hpang de kayin yu ai. Dai shaloi, Lawt a madu jan jum shadaw tai mat ai. Sum la hta shi hpe mu a ni?

Ndai lam hta na anhte kasi kaja langai mi lu la ai. Karai Kasang a ga madat ai ni hpe, hkye la nna, n madat ai ni gaw, asak sum mat na ra ai hpe, madun nga ai.