LAJ Abrahan ut li xjunkabʼal laj Lot wankebʼ Canaan. Saʼ jun kutan laj Abrahan kixye re laj Lot: ‹Arin moko wank ta naabʼal li naʼaj choʼq rehebʼ li qaketomq. Us raj naq tqajach qibʼ, wi tatxik saʼ laatzʼe, laaʼin tinxik saʼ linnim; ut wi tatxik saʼ laanim, laaʼin tinxik saʼ lintzʼe›.

Naq laj Lot kiril xteepal li Jordan kixkʼe reetal naq chaabʼil li chʼochʼ, xbʼaan naq wank haʼ ut ichaj choʼq re li xketomq. Joʼkan naq laj Lot ut li xjunkabʼal keʼkanaak saʼ li tenamit Sodoma.

Ebʼ laj Sodoma moko chaabʼilebʼ ta xnaʼlebʼ. Laj Lot chaabʼil xnaʼlebʼ, joʼkan naq moko sa ta saʼ xchʼool saʼ xyanqebʼ li poyanam aʼin. Li Yos yook ajwiʼ xjosqʼil, joʼkan naq kixtaqla wiibʼ li anjel re xyeebʼal re laj Lot naq tixsach li tenamit Sodoma ut Gomorra.

Ebʼ li anjel keʼxye re laj Lot: ‹Seebʼa aawibʼ; kʼam laawixaqil, ebʼ laarabʼin ut elenqex arin›. Abʼan, kʼajoʼ naq keʼbʼayk chi elk. Joʼkan naq keʼchapeʼk chi ruqʼ xbʼaanebʼ li anjel ut keʼisiik saʼ li tenamit. Jun li anjel kixye rehebʼ: ‹Ayuqex saʼ li tzuul, kolomaq eeribʼ ut mexʼilok cheerix re naq inkʼaʼ texkamq!›

Laj Lot ut ebʼ li xrabʼin keʼelelik ut keʼxkanabʼ li tenamit Sodoma. Inkʼaʼ keʼxaqli chi moko keʼilok ta chirix. Yookebʼ chi elelik, naq li rixaqil laj Lot kixaqli ut kiʼilok chirix. Inkʼaʼ kiʼabʼink chiru li Yos. Joʼkan naq kikanaak choʼq atzʼam joʼ nakʼutunk saʼ li eetalil.

Kʼaru naqatzol chirix aʼin? Naq li Yos naxkolebʼ li nekeʼabʼink chiru. Ut ebʼ li nekeʼxqʼet Raatin nekeʼxsach xyuʼam.