LOTA ne kisemi kyanji baikajilenga pamo ne Abalahama mu kyalo kya Kenana. Juba jimo Abalahama waambijile Lota amba: ‘Ntanda yakepa pa kuba banyama bonse bekalepo. Twabane, mwane. Umvwe mwaya kungi, ne amiwa nkaya kungi.’

Lota kepo akenkentele ne kumona wamwene musanza wawama wajinga na mema konse konsetu ne munyemvu wa kuja banyama banji. Uno wajinga Musanza wa Yodano. Lota waimene pamo na kisemi kyanji ne banyama ne kuya ku yewa musanza. Kyapeleleko wakashimikile nzubo yanji mu muzhi wa Sodoma.

Bino bantu ba mu Sodoma batamine bingi. Kino kyafichishe Lota ku muchima mambo aye wajinga muntu wawama. Nangwatu Lesa naye kyamufichishe ku muchima. Kepo Lesa atumine bamalaika babiji kuya na kujimunako Lota kuba’mba ukonauna Sodoma ne muzhi wa Gomola wajinga kipi kipi na mambo a bubipisho bwabo.

Bamalaika babujile Lota amba: ‘Imana bukiji! Ushikule ne mukazhobe, ne baana bobe babakazhi babiji mulupukemo muno!’ Lota ne mukazhanji babanjile pa kubatu’mba balupukemo, ponkapo bamalaika bebakwachile ku maboko ne kwibalupwila pangye ya muzhi. Kepo malaika umo ebambijile’mba: ‘Munyemeshetu mupulushe myeo yenu! Kechi mutale kunyuma ne. Munyemene ku mitumba kuchina’mba mwakeya konaika.’

Lota ne baana banji babakazhi bakokejile ne kunyema banyemenemo mu Sodoma. Kechi baimenepo nangwa pamo ne, kabiji kechi batajile kunyuma ne. Bino mukazhanji Lota wakankelwe kukokela. Byo baendelekotu pacheche kufuma mu Sodoma, waimene ne kutala kunyuma. Ponkapotu mukazhanji Lota waalukile ke jibwe ja mukele. Wamumona pa kipikichala nyi?

Twakonsha kufunjilako lufunjisho lwawama ku kino. Kitumwesha kuba’mba Lesa upulusha bamukokela, bino bonse babula kumukokela kechi bakekala na bumi ne.