LƆT ɛn in famili bin de wit Ebraam na Kenan. Wan de, Ebraam tɛl Lɔt se: ‘Dis ples we wi de nɔ du fɔ ɔl wi animal dɛn. Duya, lɛ wi tu de difrɛn say. We yu go wan say, a go go di ɔdasay.’

Lɔt luk di ples we de rawnd dɛn. Na de i si wan ples we gɛt wata ɛn fayn gras fɔ in animal dɛn. Di ples we i si, na di eria we de rawnd di Riva Jɔdan. So Lɔt muf wit in famili ɛn ɔl in animal dɛn. Dɛn go de na wan tɔŋ we dɛn de kɔl Sɔdɔm.

Na bad pipul dɛn bin de na Sɔdɔm. Dis mek Lɔt in at pwɛl bikɔs in na gud man. Gɔd sɛf nɔ bin gladi. So Gɔd sɛn tu enjɛl dɛn to Lɔt. Dɛn tɛl Lɔt se Gɔd de kam pwɛl Sɔdɔm ɛn wan tɔŋ we de nia de we dɛn kɔl Gomɔra, bikɔs di pipul dɛn de du bad bad tin dɛn we Gɔd nɔ lɛk.

Di enjɛl dɛn tɛl Lɔt se: ‘Mekes! Tek yu wɛf ɛn yu tu gyal pikin dɛn, ɛn kɔmɔt na dis ples!’ Lɔt ɛn in famili bin de wes tɛm, so di enjɛl dɛn ol dɛn an ɛn pul dɛn kɔmɔt na di tɔŋ. Dɔn wan pan di enjɛl dɛn se: ‘Una rɔn fɔ una layf! Una nɔ luk biɛn. Una rɔn go ɔp di il dɛn mek una nɔ day.’

Lɔt ɛn in gyal pikin dɛn du wetin di enjɛl dɛn se, ɛn rɔn kɔmɔt na Sɔdɔm. Dɛn nɔ blo smɔl sɛf, ɛn dɛn nɔ luk biɛn. Bɔt Lɔt in wɛf nɔ du wetin di enjɛl dɛn se. We dɛn dɔn go fa smɔl, na de Lɔt in wɛf tinap ɛn luk biɛn. Bɔt as i luk biɛn so, na de i tɔn sɔl. Yu de si am na di pikchɔ?

Na wetin dis de tich wi? I de tich wi se Gɔd de sev di wan dɛn we de du wetin i want. Bɔt di wan dɛn we nɔ de du wetin i want go day.