ROTO nepata lyendi kwa tungire kumwe naAbirahamu mosirongo saKanani. Ezuva limwe Abirahamu ta tantere Roto asi: ‘Apa kapi pana kara sirongo sokuvhura kutunga kumwe noyimuna yetu nayinye. Tu ligaunuke. Nsene no za koruha oru, ame tani zi korukwawo.’

Roto ta tara sirongo. Ta mono ruha rosirongo roruwa oru rwa kere nomema ntani nowayi wouwa wounzi woyimuna yendi. Ogu kwa kere mukunda gwaJorodana. Roto yipo ga dirwilire epata lyendi noyikorama yendi kwina. Moruhura tava ya tungu mositata saSodoma.

Vantu womoSodoma kwa kere wovadona sili. Eyi kwa guvisire Roto, morwa age kwa kere mugara gomuwa. Karunga nage kwa guvire. Mouhura, Karunga ta tumu vaengeli vavali va ka rondore Roto asi age kuna ka zonagura po Sodoma nositata sopopepi Gomora morwa udona wawo.

Vaengeli kwa tanterere Roto asi: ‘Genderera! Gusa mukadoge novana woge wovakadona vavali mu pwage mo omu!’ Roto nepata lyendi kwa lirenge nakauke mokuza, makura vaengeli tava va kwata komawoko nokuvapitisira va pwage mo mositata. Muengeli gumwe makura ta tanta asi: ‘Dukiseni nomwenyo deni! Mwa ha setuka konyima. Dukireni konondundu yipo mu dire kufa.’

Roto novana vendi kwa limburukwire tava duka va tunde moSodoma. Awo kapi va sikeme nampili nakauke, ntani kapi va tere konyima. Nye mukadaRoto kwa sidopere. Apa va pwege moSodoma sinano songadi, ta sikama ta tara konyima. MukadaRoto makura ta kara siguru somungwa. To mu mono mefano ndi?

Ose kuvhura kulirongera ko kweyi sirongwa sosiwa unene. Ayo kuna kulikida asi Karunga kuparura owo ava mu limburukwa, nye owo ava mu sidopa ngava zumbanesa nomwenyo dawo.

Genesis 13:5-13; 18:20-33; 19:1-29; Rukasa 17:28-32; 2 Peturusa 2:6-8.