Chihande 15

Pwevo lyaLote Atalile Kunyima

LOTE natanga yenyi vatwaminenga naApalahama muKanane. Likumbi limwe Apalahama ambile kuli Lote ngwenyi: ‘Katweshi nachihela chakulishila vimuna vetu vosenako. Kumana tulihandunune. Nge ove muya kumutamba woku, kaha ami nanguya kumutamba ukwavo.’

Lote andwile meso enyi nakushishika lifuchi. Amwene mutamba walifuchi wamwaza wapwile nameya namwila wauvulu wakulisa vimuna. Eli Lifuchi lyakuYotau. Oku kukiko Lote atwalile tanga navimuna jenyi. Kaha vatungile limbo munganda yaSotome.

Vaka-Sotome vapwile vavapi chikuma. Echi chafutwile muchima waLote, hakupwa mutu wamwaza. Kalunga nayikiye evwilenga kupihya. Jino Kalunga atumine vangelo vavali vayenga nakumulweza Lote nge mwenyeka Sotome nanganda yahachileko yaNgomola havilinga vyavipi.

Vangelo valwezele Lote ngwavo: ‘Katuka washi! Mbata puwove navana vove vamapwevo vavali nakufuma muno!’ Lote natanga yenyi valangishileko chindende, kaha vangelo vavakwachile kumavoko nakuvalovola munganda. Jino kangelo umwe ngwenyi: ‘Chinenu mulwile myono yenu! Kanda kutala cheka munyimako. Chinyinenu kupili kuchina namunonga.’

Lote navana venyi vononokele nakufuma muSotome. Kavemanyine chipwe kutala kunyima chekako. Oloze pwevo lyaLote kononokeleko. Omu vayile tunda kufuma kuSotome, emanyine nakutala cheka kunyima. Ngocho pwevo lyaLote alumukile kupwa kaumbu kamungwa. Unamumono hamuvwimbimbi uno, ngwetu?

Natulinangulaho chuma chimwe hano. Chinakusolola nge Kalunga eji kuyovola vaze vamwononoka, oloze vaze kavamwononokako navakafwa.

Kuputuka 13:5-13; 18:20-33; 19:1-29; Luka 17:28-32; WaPetulu 2, 2:6-8.