NANQʼINTOQ Lot kyukʼex toj tja junx tukʼe Abrahán atz toj txʼotxʼ Canaán. Jun maj, xi tqʼamaʼn Abrahán te Lot kyjalu: ‹Mitiʼ nim txʼotxʼ tzalu kye qalun. Chin kubʼsale twitza, paʼmil tibʼa wiʼje. Qa ma txiʼ teya tuj plaj lu, jaku chinx weye tuj juntl plaj, qatzun qa ma txiʼ teya tuj juntl plaj, jaku chinx weye tuj plaj lu›.

Xi tkeʼyin Lot txʼotxʼ. Ex tiltzun, mo tlomtzen, jun tbʼanel plaj jatumel atteq aʼ toj ex tbʼanil kʼul te kywa aluʼmj. Aju chqʼajlaj te Jordán. Tuʼntzunju, xiʼ Lot kyukʼe tuj tja ex qeʼ talin (aluʼmj) atz toj Jordán. Tbʼet ambʼil, kubʼ kybʼinchan kyja atz tuj tnam te Sodoma.

Mya bʼaʼnteq kybʼinchbʼen xjal te Sodoma. Mya bʼaʼn ela jlu toj twitz Lot, tuʼnjo tbʼanel xjaltoq te. Ax ikx mya bʼaʼn ela jlu tuj twitz Dios. Pontzun ambʼil tuʼn ttzaj tsamaʼn Dios kabʼe t-anjel tuʼn t-xi kyqʼamaʼn te Lot, qa kʼwelteq tnajsaʼn Dios tnam Sodoma ax ikxju tnam Gomorra ajo tokteq ttxlaj, tuʼnjo mya bʼaʼnqetoq.

Che chi anjel te Lot kyjalu: ‹¡Weʼktza, qʼimexa t-xuʼjila tzalu kyukʼix qe kabʼe tmeʼjela!› Mitiʼxtaq nbʼant naj tten Lot kyukʼe tuj tja, tuʼntzunjo, i etz qʼin kyuʼn anjel toj tnam. Tzajtzen tqʼmaʼn jun anjel kyxol qeju kabʼe kyjaʼ: ‹¡Chi el oqe tuʼntzun kyklete! Miʼn tzʼajtz kykeʼyin kyiʼjxiye. Ku kyxiʼye kywiʼ witz tuʼntzun miʼn kynaje›.

Xi tbʼiʼn Lot kyukʼe tmeʼl aju tzaj qʼamaʼn kye, tuʼntzun jlu, i etz oq tuj tnam Sodoma. Mitiʼ e kyaj weʼ jun rat, ex mitiʼ anjtz kykiʼn kyiʼjxi. Atzuntl te t-xuʼjil Lot mitiʼ okx tbʼiʼn. Tej otaq chi el laqʼexi chʼin tiʼj Sodoma kubʼ weʼ ex aj meltzʼaj t-xuʼjel Lot tuʼn t-xi tkaʼyin tiʼjxi. Bʼiʼx kyaj te tqan atzʼin. Ik tzeʼnj tkuʼx toj tilbʼilal.

Jaku tzʼel qiʼn jun tbʼanil techil tiʼj jlu: qa oʼkx qeju nxi kybʼiʼn tyol Dios nchi klet, aqetzenju mitiʼ nokx kybʼiʼn tyol Dios nchi kyim.