LOT kao yaniʼyale ya ñatjen tsakatio kao Abraham ya Canaán. Jngo nichxin Abraham kitsole Lot: “Likui tse ʼnde tjín ibi jñani koa̱n koatio ngatsʼi cho̱ná. Sijéle kjoanda, xín koannginle xíngiaa. Tsa ya kʼuin ya ján ya xingoani kjuia an”.

Lot kiskotsenle jochon je ʼnde. Kiskotsenle jngo naxinandá xi nʼio ndachon jñani tjín nandá kʼoa jñani nʼio tjín jñá xi koakjen cho̱le. Ya ʼnde jña nchjani Jordán. Kuinga ya kikaoni je Lot yaniʼyale kʼoa kao cho̱le ya ʼnde jebi. Kʼoa ya tsakʼénda ndʼiale ya Sodoma.

Je chjota xi kisʼe ya Sodoma nʼio tsʼen koan. Kʼoa likui kisasenle Lot, nga je nda chjota koan. Kʼoati likui kisasenle Niná. Xijekoan, jao ánkje kisikasén Niná xi kʼoakitsole Lot nga sikjeson Sodoma kʼoa kao naxinandá xi ya tíjnachrian xi Gomorra ʼmi nga tsʼen chjota xi kisʼe.

Je ánkje kitsole Lot: “¡Ngotjo kjoain! ¡Chjoai chjoónli kao nga jao xtiyánchjínli kʼoa titjui!” Lot kao yaniʼyale kisitseya, kuinga je ánkje kiskoesíni ntsja kʼoa tsakʼasjesíni ya naxinandá. Jngo ánkje xi kitso: “¡Tókao, chʼasjentjao kjoabijnachonno! Li yántsʼionjin chotsenño. Ya tókao ya nindo, ánni nga tsín kuiyásíño”.

Lot kao xtiyánchjínle kisitjoson kʼoa kitoka nga kitjo Sodoma. Likui jña tsakinyakjáya ngotjo, kʼoa likui yátsʼi̱n kiskotsenni. Tonga chjoónle Lot likui kisitjoson. Kʼianga je koankjin choale ya Sodoma, tsakasejna kʼoa kiskotsenni yátsʼi̱n. Kʼoa je chjoónle Lot ñaki koannaxa. A tiʼyaní nga séjnatʼa ibi.

Jebi nʼio nda bakóyaná: Nga Niná bʼasjentjai je xi sítjosonle, tonga xi tsín sítjosonle sícha kjoabijnachonle.