Ekitebyo 15

Muka Looti Akareeba Enyima

LOOTI n’eka ye bakaba nibatuura n’Abrahamu omu nsi ya Kanaani. Eizooba rimwe, Abrahamu akagambira Looti ati: ‘Eitaka eri hanu tiririkutumara twena n’amatungo gaitu. Ninkweshengyereza, reka tutaane. Ku oraatware orubaju rumwe, nibwo naanye ndatware orundi.’

Looti yaanaga amaisho kureeba ensi. Yaareeba omwanya murungi munonga omu nsi egyo, ogwabaire gwine amaizi n’obunyaatsi burungi bw’amatungo ge. Oru rukaba ruri Oruhita rwa Yorudani. N’ahabw’ekyo, Looti yaatwara amaka ge n’amatungo ge okwo. Aha muheru gwa byona baatuura omu rurembo rwa Sodoma.

Abantu ba Sodoma bakaba bari babi munonga. Eki kikagwisa kubi Looti, ahakuba akaba ari omushaija murungi. Kandi na Ruhanga kikamugwisa kubi. Aha muheru, Ruhanga yaayohereza baamaraika babiri okurabura Looti ngu Ruhanga akaba naaza kuhwerekyereza Sodoma hamwe n’orurembo Gomora orugihereire ahabw’obubi bwabo.

Baamaraika bakagambira Looti bati: ‘Gira obwira! Twara omukazi waawe n’abahara baawe babiri, murugye aha!’ Looti n’eka ye bakeeziringa kugyenda, nikwo baamaraika kubakwata emikono bakabashohoza kuruga omu rurembo. Reero omwe ahari baamaraika yaagira ati: ‘Mwirukye muhunzye amagara gaanyu! Mutakareeba enyima. Muhungire omu bibungo, mutakaafa.’

Looti n’abahara be baayoroba batyo baahunga kuruga Sodoma. Tibarayemereire nakakye, kandi tibarareebire enyima. Kwonka muka Looti akagoma. Ku baaherize kugyendaho akaanya kuruga Sodoma, akemerera kandi yaareeba enyima. Muka Looti atyo yaahinduka enyomyo y’omwonyo. Nomureeba aha omu kishushani?

Nitwega eishomo rikuru kuruga omuri eki. Nikyoreka ngu Ruhanga naajuna abo abarikumworobera, kwonka abo abatarikumworobera nibaija kufeerwa amagara gaabo.

Okutandika 13:5-13; 18:20-33; 19:1-29; Luka 17:28-32; 2 Petero 2:6-8.