LƆƆTO nee ye abusua ne dɛnlanle Ebileham anwo wɔ Keena azɛlɛ zo. Kenle ko Ebileham zele Lɔɔto kɛ: ‘Azɛlɛ ne ɛnza yɛ nyɛmoa ne mɔ. Mesɛlɛ wɔ, te ɛ nwo. Saa ɛkɔ bɛne zo a, mebahɔ fema zo.’

Lɔɔto dole ɔ nye nleanle azɛlɛ ne. Ɔnwunle maanle ne anu azɛlɛ kɛnlɛma kpalɛ bie mɔɔ lɛ nzule dɔɔnwo nee ndile kpalɛ mɔɔ ye nyɛmoa ne mɔ bali a. Ɛhye wɔ Dwɔdan Maanzinli ne anu. Yemɔti Lɔɔto vale ye abusua ne nee ye nyɛmoa ne mɔ hɔle ɛkɛ. Akee bɛhɔkyekyele bɛ aako wɔ Sodɔm.

Ɛnee menli mɔɔ wɔ Sodɔm la ɛbɛla ɛzɛkye kpalɛ. Ɛhye gyegyele Lɔɔto, ɔluakɛ ɛnee ɔle sonla kpalɛ. Nyamenle noko akunlu andwo nwolɛ. Awieleɛ kolaa ne, Nyamenle zoanle anwumabɔvolɛma nwiɔ kɛ bɛhɔbɔ Lɔɔto kɔkɔ kɛ ɔlɛba yearazɛkye Sodɔm nee suakpole Gɔmɔla mɔɔ bikye ye la ɔlua bɛ ninyɛndane ne ati.

Anwumabɔvolɛ ne mɔ hanle hilele Lɔɔto kɛ: ‘Ka ɛ nwo! Fa ɛ ye nee ɛ mra mraalɛ nwiɔ ne na nriandi fi ɛke!’ Lɔɔto nee ye abusua ne hwehwenle bɛ bo aze, yemɔti anwumabɔvolɛ ne mɔ zɔle bɛ sa na bɛ nee bɛ rale suakpole ne kandiba. Akee anwumabɔvolɛ ne mɔ anu ko zele kɛ: ‘Bɛnriandi bɛlie bɛ ngoane! Bɛmmato bɛ nye bɛ nzi. Bɛnriandi bɛhɔ awoka ne mɔ azo lɔ, anrɛɛ bɛkɛwu.’

Lɔɔto nee ɔ mra mraalɛ ne mɔ diele na bɛnriandile bɛvile Sodɔm. Bɛangyinla ekyii bɔbɔ, yɛɛ bɛando bɛ nye bɛ nzi. Noko Lɔɔto aye ne andie. Bɛvile Sodɔm bɛhɔle ekyii la, ɔgyinlanle na ɔdole ɔ nye ɔ nzi. Na Lɔɔto aye ne hakyile ngyenle pila. Ɛnwu ye wɔ nvoninli ne anu ɔ?

Yɛbahola yɛazukoa debie kpalɛ yɛavi ɛhye anu. Ɔmaa yɛnwu kɛ Nyamenle die bɛdabɛ mɔɔ bɛtie ye la ngoane, na bɛdabɛ mɔɔ bɛndie ye la ngoane babɔ bɛ.