15 yachachiy

Lotpa warmin kutirikun

LOT familiantin, Abrahamwan Canaán jallpʼapi tiyakuchkarqanku. Juk pʼunchayqa Abraham Lotman nirqa: ‘Mana tukuy uywasninchikpaq mikhuna kanchu. Munasqaykita akllakuy, ñuqamantataq tʼaqakuy. Qam lluqʼiman riptiyki, ñuqa pañaman risaq’, nispa.

Lotqa jallpʼata qhawaspa, uywasninpaq allin pampata rikurqa, yakuyuqta, qhurayuqta ima. Chaytaq Jordanniqpi karqa. Lotqa familianwan, uywasninwan ima, chayman ripurqanku. Sodomapi llaqtachakuspataq wasita ruwakurqanku.

Sodomamanta runaqa may saqra karqa. Lottaq kʼacha runa karqa, chayrayku llakikuq. Diospis chay runakunata rikuspa llakikullaqtaq. Chayrayku, Diosqa iskay angelesta Sodomap Gomorrap, thuñikuyninmanta Lotman willanankupaq kacharqa.

Angelesqa Lotta nirqanku: ‘¡Usqhayta ripuy! ¡Pusakapuy warmiykita, iskaynin ususisniykitawan!’ Lotqa familianwan mana usqhayta lluqsirqachu, chayrayku angelkunaqa makinmanta japʼispa llaqtamanta urqhurqanku, chaypitaq juk ángel nirqa: ‘¡Usqhayta ayqikuychik ama wañunaykichikpaq! Ama qhipata qhawaspa. Chiqanta riychik urqusman, mana wañunaykichikpaq’, nispa.

Lotqa ususisninwan Sodomamanta ayqirqa. Mana sayarispa nitaq qhipata qhawarispa ayqirqanku. Lotpa warmintaq mana kasukurqachu. Sodomamanta lluqsichkaspa kutirikuytawan qhipata qhawarqa. Chayllapi warmiqa kachiman tukurqa. ¿Chay kachita rikunkichu?

Kaymantaqa juk kʼamiyta yachakusunman: Diosninchikqa kasukuqkunata salvan, mana kasukuqkunatataq wañupunankuta saqin.

Génesis 13:5-13; 18:20-33; 19:1-29; Lucas 17:28-32; 2 Pedro 2:6-8.