Makani 15: Mukaintu wa Loti Wakaceba
LOTI amukwasyi wakwe bakakkala antoomwe a Abbulahamu munyika ya Kenani. Buzuba bumwi Abbulahamu wakati kuli Loti: ‘Taku busena bunji bwakucezyela ŋombe zyesu ambelele. Ndilomba kuti twaandaane. Ikuti uye kulumwensyi nkokuti mebo ndilaya kululyo.’
Loti wakailanga-langa nyika. Wakabona busena bwacisi bwiinda kubota bwakajisi meenda manji amacelelo mabotu aazivwubwa zyakwe. Oobu bwakali Busena bwaku Jodano. Aboobo Loti wakalonga amukwasyi wakwe antoomwe aŋombe ambelele. Kumane bakayaka munzi mumunzi wa Sodoma.
Bantu baku Sodoma bakali babi kapati. Eeci cakamukalazya Loti nkaambo walo wakali muntu uuli kabotu. Leza awalo wakakalala. Kumane Leza wakatuma bangelo bobilo kuti bamucenjezye Loti kuti Leza wakali kuyanda kuunyonyoona munzi wa Sodoma a Gomola akaambo kazibi zyabo.
Bangelo bakaambila Loti kuti: ‘Fwambaana! Bweza mukaintu wako abana bako basimbi bobilo muzwe muno!’ Loti amukwasyi wakwe bakacili kuwayawaya, eelyo bangelo bakabakwela kujanza akubagusya mumunzi. Kumane umwi mungelo wakati: ‘Kamufwambaana! Mutacebi. Amuccijile kumalundu kutegwa mutajaigwi.’
Loti abana bakwe basimbi bakaswiilila, aboobo bakazwa mu Sodoma kabalunduka. Tiibakapumuna munzila nikuba kuceba. Pele mukaintu wa Loti tanaakaswiilila pe. Beende buyo aaniini kuzwa mu Sodoma, mukaintu wakwe wakaima akuceba. Kumane mukaintu wa Loti wakaba cilundu camunyo. Hena ulakonzya kumubona acifwanikiso?
Tulakonzya kwiiya ciiyo cibotu kumani aaya. Twabona kuti Leza ulafwutula aabo bamuswiilila, pele aabo batamuswiilili takabafwutuli.
Matalikilo 13:5-13; 18:20-33; 19:1-29; Luka 17:28-32; 2 Pita 2:6-8.
Mibuzyo
- Nkaambo nzi Abbulahamu a Loti ncobakaandaana?
- Nkaambo nzi Loti ncaakasala kukkala mu Sodoma?
- Bakali buti bantu bamu Sodoma?
- Ncinzi bangelo bobilo ncobakamucenjezya Loti?
- Nkaambo nzi mukaintu wa Loti ncaakaba cilundu camunyo?
- Nciiyo nzi ncotukonzya kwiiya kuli cakacitika kuli muka Loti?
Mibuzyo aimwi
- Bala Matalikilo 13:5-13.
Nciiyo nzi ncotukonzya kwiiya kuli Abbulahamu notubamba twaambo abantu? (Matl. 13:8, 9; Balo. 12:10; Flp. 2:3, 4)
- Bala Matalikilo 18:20-33.
Mbuti kweendelezya Jehova nkwaakeendelezya Abbulahamu ncokutupa lusyomo lwakuti Jehova a Jesu baya kubeteka cabululami? (Matl. 18:25, 26; Mt. 25:31-33)
- Bala Matalikilo 19:1-29.
Mbuti cibalo eeci ca Bbaibbele mbocitondezya Leza mbwakubona koonana kwabasankwa balikke-likke? (Matl. 19:5, 13; Lev. 20:13)
Nkwiindana kuli buti nkotujana munzila Loti a Abbulahamu mbobakacita kubusolozi bwa Leza, alimwi ncinzi ncotukonzya kwiiya kumakani aaya? (Matl. 19:15, 16, 19, 20; 22:3)
- Bala Luka 17:28-32.
Moyo uuli buti wakuyanda lubono lwakumubili muka Loti ngwaakajisi, alimwi mbuti eeci mboili ncenjezyo kuli ndiswe? (Lk. 12:15; 17:31, 32; Mt. 6:19-21, 25)
- Bala 2 Pita 2:6-8.
Kwiinda mukwiiya Loti, ino tweelede kwiibona buti nyika eeyi iijisi milimo iitali yabuna Leza? (Ezk. 9:4; 1 Joh. 2:15-17)
