JA Lot sok ja spamilya ti kulane sok ja Abrahani bʼa slujmalil Canaán. Jun kʼakʼu ja Abrahán yala yabʼ ja Lot: «Ja jchantetiki jelxa pojxita ele sok ja ili mixa staʼa bʼa oj ajyuke sok mixani swaʼele. Aʼawa pabor, la jpiljbʼajtik. Ta weʼn oj wajan ili, ja keʼn oj wajkon bʼa pilan».

Ja Loti ti skʼela ja luʼumi, sok yila jun niwan lekil penka luʼum ayiʼoj jaʼ ja bʼa chonabʼi sok jitsan ak ja bʼa xchanteʼi. Jani ja slechanal ja slujmalil Jordani. Ja yuj, ja Lot waj sok ja spamilya soka xchante jumasaʼ bʼa tiw. Tixa skʼulane ja snaje ja bʼa xchonabʼil Sodoma.

Ja swinkil ja Sodoma jel kistal ja jastik wa skʼulane. Ja it mini tʼun lek xyila ja Loti, yujni ja yeʼn wa xyaʼteltay ja Dyosi. Ja Dyosi cha mini lek xyilaʼa. Ja yuj ja yeʼn sjeka chabʼ yanjel bʼa oj yal yabʼ ja Lot ja chonabʼ Sodoma sok ja tey stsʼeʼeli ja Gomorra oj ajuk chʼaysnajel yujni jel kistal ja jastik wa skʼulaneʼi.

Ja anjel jumasaʼ yalawe yabʼ ja Lot: «¡Nutsu abʼaj! ¡Iʼaj jawa cheʼumi sok ja xchabʼil wa wakʼixuki sok elan ja bʼa il!». Pe ja Lot sok ja spamilya mi snutsu sbʼaje, ja yuj ja anjel jumasaʼ syamawe yi ja skʼabʼi sok ya eluke ja bʼa chonabʼi. Anto june ja bʼa anjeli ti yalaʼa: «¡Ajnanik bʼa mi oj chamanik sok moka kʼel apatikex! Kaʼaxik man bʼa wits, bʼa oj kananik sakʼan».

Ja Lot sok ja xchabʼil yakʼixuki skʼuʼane sok elye ja bʼa Sodoma. Mini kʼotye tʼun tekʼana sok mi skʼela spatike. Pe ja xcheʼum ja Loti mini skʼuʼana. Yajni ayxa jun makʼe elele ja bʼa chonabʼi, ja xcheʼum ja Loti kʼot tekʼan sok skʼela spatik. Anto ja ixuki tixta pax jun splanta atsʼam ton. ¿Wan maʼ xbʼobʼ awil ja bʼa dibujo?

Soka jas ekʼi wa xbʼobʼ jnebʼtik jun jasunuk jel tʼilan: wa sjeʼa kitik ja matik kʼuʼabʼal aye soka Dyosi, ja yeʼn wani skoltaʼa. Pe ja matik mi skʼuʼane yiʼi ojni chamukeʼa.