LOT chu Abrahán xkatawilakgolh xfamiliajkan anta kCanaán. Akgtum kilhtamaku Abrahán wanilh Lot: Unu nialh kaʼakchani sekget kianimaleskan. Tanu tanu natawilayaw. Komo wix unu napina akit alakatanu nakan.

Lot akxilhli katiyatni. Chu akxilhli akgtum kalanka kakiwin xla kachikin, niku xʼanan lhuwa sekget chu chuchut xlakata nawakgoy xʼanimales. Uma kakiwin xalak Jordán xwanit. Wa xlakata Lot kalilh xfamilia chu xʼanimales. Chalh kilhtamaku tlawakgolh xchikkan anta kSodoma.

Kristianos xalak Sodoma lu nitlan xlikatsikgoy. Lot ni xʼakxilhputun xtayatkan xlakata Lot tlan xlikatsiy. Dios na ni xkakxilhputun. Chalh kilhtamaku, akxni Dios malakgachalh chatiy ángeles xlakata namakatsinikgoy Lot pi xʼama malakgsputuy Sodoma chu Gomorra xlakata nitlan xlikatsikgoy.

Ángeles wanikgolh Lot: ¡Kalakapalatit! ¡Kamakgachipa minpuskat chu mi laktsuman chu kapitit! Lot chu xfamilia ni xlakapalakgoy, wa xlakata ángeles kamakgachipaxtukgolh kkachikin. Chu chatum ángel tiku kamakgachipaxtulh kawanilh: ¡Kakgosnantit kalakgmaxtutit mi latamatkan! Ni katalakgaspittit. Kapitit kkasipijni, xlakata ni naniyatit.

Lot chu xlaktsuman kgalhakgaxmatnikgolh Dios chu taxtukgolh kSodoma. Ni tachokgokgolh, ni tsinu jaxkgolh chu ni talakgaspitkgolh. Pero xpuskat Lot ni kgalhakgaxmatninalh. Akxni makgata xʼankgonit niku wi Sodoma tayalh chu talakgaspitli. Akxni talakgaspitli xamatsat chiwix wa. ¿Akxilhpat anta kdibujo?

Uma lanka liʼakxilhtit kinkamasiyaniyan. Dios kalakgmaxtuy kaj wantiku kgalhakgaxmatkgoy tuku kawanikan, pero wantiku ni kgalhakgaxmatkgoy kamalakgsputukan.