ЛОТ болгаш ооң өг-бүлези Авраа́м-биле кады Ханаа́н черинге чурттап турган. Бир-ле катап Авраа́м Ло́тка чугаалаан: «Мында малывыска чер эвээш-тир. Дилеп тур мен, аңгылажып алыылам. Бир эвес сен бир талаже чоруур болзуңза, мен өскээр углаптар мен».

Лот черни долгандыр көрген. Суг агып чыдар база малга хөй шык оът-сигенниг дыка чараш черни ол көрүп каан. Ол Иорда́нның чоок-кавызы болган. Лот өг-бүлези болгаш мал-маганы-биле ол черже көжүп чорупкан. Сөөлүнде барып олар Содо́м хоорайга чурттай бергеннер.

Содо́мнуң чурттакчылары дыка каржы турган. Лот буянныг кижи турган, ынчангаш ол дээш муңгараар турган. Бурганны база бо чүүл муңгарадып турган. Ам-на Бурган Содо́мну болгаш ооң чанында Гомо́рра хоорайны каржы чоруктары дээш узуткаар шиитпирин дамчыдары-биле дээрниң ийи төлээлерин Ло́тче чоргускан.

Дээрниң төлээлери Ло́тка дужааган: ‘Кадайыңны база ийи кыс урууңну алгаш, моон дүрген чору!’. Лот болгаш ооң өг-бүлези дыка-даа далашпайн турган, ынчангаш дээрниң төлээлери оларны холундан четкеш, хоорайдан үндүрер ужурга таварышкан. Ооң соонда дээрниң төлээзи чугаалаан: ‘Камгаланыңар! Хая көрүнмеңер. Өлбес дээш, дагларже дезип халыңар’.

Лот уруглары-биле дыңнангыр бооп, Содо́мдан маңнап чорупкан. Олар бичии-даа када турбаан база хая көрүнмээн. Ынчалза-даа Ло́ттуң кадайы дыңнангыр эвес болган. Кажан олар Содо́мдан элээн ырай бергенде, Ло́ттуң кадайы турупкаш, хая көрнүпкен. Ол доп-дораан дус чагы апарган. Чурукта ону көрүп тур сен бе?

Моон бис эки өөредиг билип ап болур бис. Бурган чүгле ону дыңнаар улусту камгалаар, а дыңнангыр эвес улус өлүп каар деп билдингир.