Tantara 15

Nitodiky Vadin’i Lota

LOTA ndreky vadiny, ndreky ry zanany tanàna araiky tamin’Abrahama ta Kanana. Andra araiky Abrahama nivolan̈a tamy Lota: ‘Tsy ampy raha tarimitsika eky tany ty. Izikoa mety, tsara amitsika misaraka. Anao koa man̈avaratra, zaho han̈atsimo.’

Lota nizahazaha tany amy zay. Izy nahita tany tsara misy rano ndreky ahitry mahitso ahanin’ny biby. Izio faritry araiky man̈odidin̈y Jordana. Lota ndreky vadiny, ndreky ry zanany, ndreky biby nitariminy nifindra tan̈y. Farany amy zay, irô nipetraka ta Sodoma.

Olo ta Sodoma tao faran-draha ratsy fan̈ahy eky. Nampalahelo Lota raha zen̈y, fôtony izy olo tsara fan̈ahy. Zan̈ahary koa mba nalahelo. Zen̈y nahavy Zan̈ahary nan̈iraka anjely aroe hampitandrin̈y Lota fa izy handravan̈a tanàna Sodoma, ndreky Gomora, tanàna marikitry Sodoma, fôtony haratsian̈a tao efa be loatra.

Volan̈in’anjely aby io tamy Lota: ‘Malaky! Indesa vadinao ndreky zanakanao aroe vavy. Mialà ao!’ Mbala nirekireky fo ry Lota, ke nantsoritin’anjely aby io tan̈an-drô, baka iô irô nindesin-drô tambelan̈a tanàna tan̈y. Araiky tamin’anjely aby io amy zay nivolan̈a: ‘Milifasa anarô beky tsy maty. Kaza mitoditodiky. Milifasa an̈abo bongo an̈y, beky anarô tsy maty.’

Lota ndreky ry zanany man̈angy nan̈araka volan̈a, ke nilomoay mare, niala ta Sodoma tao. Irô tsy nijanojanon̈o sady tsy nitodiky foeky. Vadin’i Lota tsy nan̈araka volan̈a. Irô koa fa niala lavitry tanàna Sodoma, izy nijanon̈o, nitodiky. Izy baka tiô nivadiky bolongan-tsira. Mba hitanao izy amy sary io?

Misy fianaran̈a tsara azotsika boaka amy zen̈y. Zan̈ahary man̈avotro zay olo man̈araka volan̈anany, fa zay olo tsy man̈araka volan̈anany hofoaty.

Genesisy 13:5-13; 18:20-33; 19:1-29; Lioka 17:28-32; 2 Petera 2:6-8.