LOTI ni liŵasa lyakwe ŵatamilaga yimpepe ni Abulahamu m’cilambo ca Kanani. Lisiku line Abulahamu ŵamsalile Loti kuti: ‘Akuno kwangali malo gakwanila yilango yetu yosope. Kwende tulekangane, naga mkwawula kumlyo, une cinjawule kumciji.’

Loti ŵacilolecesye cilamboco. Jwalakwe ni ŵajiweni mbali jine jambone ja cilamboco jajakwete mesi ni mopo wa yilango yakwe. Welewu waliji Upande wa Yolodani. Sambano Loti ŵasamile ni liŵasa lyakwe yalumo ni yilango yakwe kwawula ku upandewu. Pambesi pakwe ŵatemi mu msinda wa Sodomu.

Ŵandu ŵa mu Sodomu ŵaliji ŵakusakala mnope. Yeleyi yamsakalisye Loti ligongo jwalakwe ŵaliji mundu jwambone. Mlungu yamsakalisyesoni. Kaneko, Mlungu ŵatumisye malayika gaŵili kuti gakamkalamusye Loti kuti jwalakwe cajonanje ŵandu mu msinda wa Sodomu ni msinda wine wawaliji pakuŵandika, wa Gomola, ligongo lya yitendo yawo yakusakala.

Malayikago gamsalile Loti kuti: ‘Mjanguye! Mwajigale ŵamkwenu ni ŵanace ŵenu ŵacakongwe ŵaŵili ni mkopoce amuno!’ Loti ni liŵasa lyakwe ŵacelewaga, ni malayika gala gakamwile pamkono ni kwakoposya mu msindawo. Kaneko limo mwa malayikago lyasalile kuti: ‘Awutuce kuti awukulupusye umi wawo! Akalola munyuma. Atilile kumatumbi kuti akawa.’

Loti ni ŵanace ŵakwe ŵapikanile nikutila mu Sodomu. Nganajima palipose, soni nganalola munyuma. Nambo ŵamkwawo Loti nganapikanila. Ali agambile kutila pakamkuli kamnono kutyocela mu Sodomu, ŵalakwewo ŵajimi nikulola munyuma. Kaneko ŵamkwawo Lotiwo ŵasyucile lisugulu lya njete. Ana akwawona pa ciwulilipo?

Mpaka tulijiganye lijiganyo lyambone pangani jeleji. Jikutukamucisya kumanyilila kuti Mlungu akusiŵakulupusya ŵandu ŵakusampikanila, nambo ŵangampikanila cacijasa umi wawo.