LOT yéetel u láakʼtsilileʼ u múuchʼ kajlikoʼob kaʼach yéetel Abraham tu luʼumil Canaán. Upʼéel u kʼiinileʼ Abrahameʼ tiaʼalaj tiʼ Lot: Wayeʼ minaʼan tuʼux u yantal tuláakal k-aalakʼoʼob. Beet uts a jumpáaykuntkaba tiʼ teen, wa ka bin xamaneʼ teneʼ kin bin noojol.

Loteʼ tu paktaj le luʼumoʼ, ka tu yilaj u xóotʼ luʼum yaan jaʼeʼ yéetel xíiw utiaʼal u yaalakʼoʼob. U luʼumil Jordán. Le oʼolaleʼ, Loteʼ tu bisaj u láakʼtsilil yéetel u yaalakʼiʼ. Ka máan kʼiineʼ tu beetaj u yotoch tu kaajil Sodoma.

U kajnáaliloʼob Sodomaeʼ jach kʼasaʼanoʼob kaʼachi. Lelaʼ ku kʼuuxbesik Dios bey xan Lot, tumen letiʼeʼ uts. Le oʼolaleʼ, Dioseʼ tu túuxtaj kaʼatúul ángeloʼob ka u yaʼaloʼob tiʼ Lot u kaʼaj u xuʼuls tiʼ Sodoma yéetel Gomorra, le kaaj yaan naatsʼ tiʼoʼ, tumen jach kʼasaʼan u kajnáaliloʼob.

Le ángeloʼoboʼ tiaʼaloʼob tiʼ Lot: ¡Seʼebkunte! ¡Jóokʼen yéetel a watan bey xan yéetel a kaʼatúul x-chʼupul paalaloʼoboʼ! Lot yéetel u láakʼtsilileʼ xanchaj u jóoʼloʼob, le oʼolal machaʼab u kʼaboʼob tumen le ángeloʼoboʼ ka jóoʼsaʼaboʼob tiʼ le kaajoʼ. Utúul tiʼ le ángeloʼob túunoʼ, tiaʼalaj: ¡Alkabneneʼex yoʼolal maʼ kíimleʼex! Maʼ paakateʼex paachil. Xeeneʼex áalkabil teʼ kʼáaxoʼ, yoʼolal maʼ kíimleʼex.

Lot yéetel u paalaleʼ tu yuʼuboʼob tʼaan, lukʼoʼob Sodoma. Maʼ jeʼeloʼob mix tuʼuxiʼ yéetel maʼ paakatnajoʼob paachiliʼ. Baʼaleʼ, u yatan Loteʼ maʼ tu yuʼubaj tʼaaniʼ. Ka tsʼoʼok u chan náachtaloʼob tiʼ u kaajil Sodomaeʼ, waʼalajeʼ ka paakatnaj paachil. Bey túunoʼ, u wíinklil u yatan Loteʼ taʼabchaji. ¿Táan wa wilik teʼ dibujoaʼ?

Lelaʼ yaan baʼax ku kaʼansiktoʼon: Dioseʼ ku kanáantik le máaxoʼob ku uʼuyaj tʼaanoʼoboʼ, baʼaleʼ le maʼatech u uʼuyaj tʼaanoʼobeʼ ku kíimloʼob.