Ododo 16

Icaka Onongo Dako Maber

IN INGEYO dako ma tye i cal-li? Nyinge Labeka. Laco ma en bino ka rwate kwede-ni nyinge Icaka. Labeka obidoko dakone. Man otimme nining?

Abraim won Icaka onongo mito nongo dako maber pi latinne. En onongo pe mito ni Icaka onyom dako mo me Kanaan, pien gin onongo giworo lubanga mapol me goba. Pi meno Abraim olwongo laticce ci owaco ni: ‘Amito ni icit i Karan ka ma wadina gitye iye wek inong dako ki woda Icaka.’

Cutcut latic pa Abraim okwanyo kinaga apar ci ocako wot mo mabor. I kare ma en oo ma cok ki ka ma wadi pa Abraim gikwo iye, en ocung i nget wang it. Onongo dong cawa me otyeno, kare ma mon me boma meno gicito kwede ka omo pii ki i wang it. Pi meno latic pa Abraim olego bot Jehovah ni: ‘Dako ma bimina pii, ka dok miyo bene bot kinagana en aye obed dako pa Icaka.’

Cutcut Labeka obino ka twomo pii. I kare ma latic-ci openye pii amata, en omiye. En ocito ci otwomo pii pi kinaga ma orwo nekogi ducu. Meno onongo obedo tic matek adada pien kinaga gimato pii tutwal.

I kare ma Labeka otyeko timo man, latic pa Abraim openye nying wonne. En bene openyo ka ce etwero nongo kabuto pi dyewor acel i pacogi. Labeka owacce ni: ‘Wora nyinge Becweri, dok kabuto bene tye piri i otwa.’ Latic pa Abraim onongo ngeyo gire ni Becweri obedo wod pa Nakor omin Abraim. Pi meno en ogungo piny ci opwoyo Jehovah me tere bot wadi pa Abraim.

I dyewor meno latic pa Abraim otito bot Becweri gin ki Laban omin Labeka gin mumiyo ebino. Gin aryo ducu guye ni Labeka twero wot me nyomme gin ki Icaka. I kare ma kipenye Labeka ogamo ningo? En owaco ni ‘Ee,’ en emito wot. I nino ma lubo meno kikome gin guito i wi kinaga ci gucako wot mabor tutwal-li me dok i Kanaan.

I kare ma guo, onongo dong otyeno. Labeka oneno ka laco mo woto i dye poto. Meno aye onongo Icaka. Iye onongo yom tutwal me neno Labeka. Minne Cara onongo dong oto woko mwaka adek i ngec, dok en onongo pud tye ka kumo pire. Ento Icaka omaro Labeka adada, ci iye odoko yom odoco.

Acakki 24:1-67.