BUSHE uyu mwanakashi ali pa cikope naumwishiba? Ishina lyakwe ni Rebeka. Kabili umwaume uuleisa mu kumukumanya ni Isaki. Rebeka aisa kuli Isaki ukuti abe umukashi wakwe. Cali shani pa kuti basange Rebeka?

Abrahamu, wishi wa kwa Isaki alefwaya umwana wakwe ukuupa umwanakashi umusuma. Talefwaya umwana wakwe ukuupa umwanakashi umwina Kanaani, pantu abena Kanaani balepepa balesa ba bufi. E ico Abrahamu aitile umubomfi wakwe no kumweba ati: ‘Ndefwaya ukuti uleya ku Harani kuli balupwa lwandi no kuyafwaila umwana wandi Isaki umukashi.’

Apo pene fye, umubomfi wa kwa Abrahamu abuulile ingamila 10 no kwima ubulendo. Ilyo afikile mupepi no ko balupwa lwa kwa Abrahamu baleikala, aiminine pa cishima. Afikile pali ici cishima icungulo, inshita abanakashi ba mu musumba batemenwe ukuya mu kutapa amenshi. E ico umubomfi wa kwa Abrahamu alipepele kuli Yehova ati: ‘Lekeni umwanakashi uwalapeela ine e lyo ne ngamila amenshi ya kunwa e o abe umukashi wa kwa Isaki.’

Tapakokwele, Rebeka alishile mu kutapa amenshi. Ilyo umubomfi wa kwa Abrahamu alombele amenshi, Rebeka alimupeele. Lyene atapiile ne ngamila amenshi ayengi pa kuti shinwe. Uyu wali mulimo uwakosa sana pantu ingamila shilanwa sana amenshi.

Ilyo Rebeka apwishishe ukunwensha ingamila amenshi, umubomfi wa kwa Abrahamu alimwipwishe ishina lya bawishi. Alombele no kuti ayelaala ku ng’anda ku mwabo. Rebeka ayaswike ati: ‘Ndi mwana wa kwa Betuele, kabili kuti mwaisasendama ku ng’anda ku mwesu.’ Umubomfi wa kwa Abrahamu alishibe ukuti Betuele ali mwana wa kwa Nahore, munyina Abrahamu. E ico alifukeme no kutasha Yehova pa kumutungulula kuli balupwa lwa kwa Abrahamu.

Ilyo bwailile, umubomfi wa kwa Abrahamu aebele Betuele na Labani, ndume ya kwa Rebeka ico ailile kulya. Bonse babili balisumine ukuti Rebeka kuti aya no mubomfi wa kwa Abrahamu no kuyaupwa kuli Isaki. Bushe Rebeka ayaswike shani ilyo bamwipwishe nga kuti aya? Atile, ‘Ee ndeya nankwe.’ E ico ubushiku bwakonkelepo balimine no kubwelelamo ku Kanaani.

Ilyo bafikile ku Kanaani mu cungulo, Rebeka amwene umwaume umo ale-enda mu mpanga. Uyu mwaume aali ni Isaki. Isaki alitemenwe icine cine ukumona Rebeka. Papitile fye imyaka itatu ukufuma apo Sara, nyina wa kwa Isaki afwilile kabili pali iyi nshita Isaki ninshi acili no bulanda. Isaki alitemenwe Rebeka icine cine kabili ici calengele ukuti abe ne nsansa na kabili.