Maana 16nan

Isaka ye muso ɲuman sɔrɔ

I ƝƐ bɛ muso min na ja kan yan, i b’a dɔn wa? A tɔgɔ ye ko Rebɛka. A bɛ ka na cɛ min fan fɛ, o ye Isaka ye. Rebɛka bɛna kɛ Isaka muso ye. I b’a dɔn o kɛra cogo min na wa?

Ibrahima tun b’a fɛ ka muso ɲuman ɲini a denkɛ ye. A tun t’a fɛ Isaka ka Kananmuso furu, bawo o mɔgɔw tun bɛ boliw bato. O la sa, Ibrahima y’a ka baaraden wele,  k’a fɔ a ye ko: ‘Ne b’a fɛ i ka segin ne faso la Karan, ne balimaw sigilen bɛ yɔrɔ min na, ka muso dɔ ɲini ne denkɛ Isaka ye.’

O yɔrɔnin bɛɛ la, Ibrahima ka baaraden ye ɲaamɛ tan ta, ka taama jan daminɛ. A surunyara tuma min na Ibrahima faso la, a y’a jɔ kɔlɔnda dɔ la. Wuladanin tun sera. O waati de la dugu-kɔnɔ-musow bɛ na ji bɔ kɔlɔn na. O la, Ibrahima ka baaraden ye Jehova deli, k’a fɔ a ye ko: ‘Muso min bɛna ji di ne, ani ne ka ɲaamɛw ma, o ka kɛ muso ye, e ye min ta walisa a ka kɛ Isaka muso ye.’

A ma mɛn, Rebɛka nana ji bɔ kɔlɔn na. Ibrahima ka baaraden y‘a fɔ a ye ko a ka ji dɔ di a ma. Rebɛka ye ji di a ma. Minnɔgɔba tun bɛ ɲaamɛw na. Rebɛka taara ka ji bɔ ka di olu bɛɛ fana ma. O tun tɛ baara nɔgɔn ye bawo ɲaamɛw bɛ ji caman min.

Rebɛka tilala o la minkɛ, Ibrahima ka baaraden y’a ɲininka a fa tɔgɔ la. A y’a ɲininka fana ni ale bɛ se ka siyɔrɔ sɔrɔ u ka so. Rebɛka ko: ‘Ne fa ye Bɛtuɛl ye. Siyɔrɔ fana bɛ an ka so.’ Ibrahima ka baaraden tun b’a dɔn ko Bɛtuɛl ye Ibrahima balimakɛ Nahɔr denkɛ ye. O la sa, a y’i ɲɔngiri ka Jehova fo, bawo Jehova ye ale ɲɛminɛ ka na ni a ye Ibrahima balimaw ka so.

O su yɛrɛ la, Ibrahima ka baaraden y’a nakun fɔ Bɛtuɛl ni Laban ye. Laban ye Rebɛka kɔrɔkɛ de ye. U fila bɛɛ sɔnna Rebɛka ni ale ka taa ɲɔgɔn fɛ, walisa Rebɛka ka kɛ Isaka muso ye. U ye Rebɛka ɲininka tuma min na ni a b’a fɛ ale ni Ibrahima ka baaraden ka taa ɲɔgɔn fɛ, Rebɛka ko: ‘Ɔwɔ.’ O dugujɛ yɛrɛ la, u yɛlɛnna ɲaamɛw kan ka taama jan daminɛ, ka segin Kanan.

U sera Kanan wuladanin fɛ. Rebɛka ye cɛ dɔ taamatɔ ye foro kɔnɔ. O cɛ tun ye Isaka ye. A ye Rebɛka ye tuma min na, a nisɔndiyara kosɛbɛ. Isaka woloba Saran sara a san saba filɛ nin ye. O dusukasi tun bɛ Isaka la halisa. Nka, Isaka nana Rebɛka kanu kosɛbɛ sisan. A ye hɛrɛ sɔrɔ kokura.

Jenɛse 24:​1-67.