Abahüdaguni 16

Aban würi buitu lun Isaakü

SUBUDITU san würi to lídanboun dibuhu bun? Rebeka tíribei. Wügüri le uagunbei tidin Isaakü. Tuguyaba lani weiriou. Ida liña lasuseredun le?

Busenti meha Abüraámü, le lúguchi Isaakü, aban würi buitu lun liráü lun lánime weiriou. Mabuseerunti meha lun lamarieidun Isaakü tuma aban würi Kananna, ladüga hudugua hamá  gürigia hagía houn búngiugu mama inarünitiñu. Ligía lariñagunbei Abüraámü lun lumusun: ‘Busentina bagiribudun ñeinhin lubéi heredera niduheñu Arán, lun banúadahan aban würi lun Isaakü le niráü.’

Furesegueina aba lanügün lumusun Abüraámü diisi kameyu, aba ladügüni lidise wéiyaasu ligía. Dan le layarafadunbei lun fulasu le ñein lubéi haganawa liduheñu Abüraámü, aba lararamagun laru aban welu. Laguñeeduña, dan le houdin würiña lílana uburugu adabura duna welurugugiñe. Ligía lariñagunbei lumusun Abüraámü lun Heowá lidan lafurieidun: ‘To würi to ibihitu duna nun luma houn kameyu ha, tuguya lan banúadira lun lánime Isaakü weiriou.’

Murusun dan lárigiñe aba tiabin Rebeka adabura duna. Dan le lamuriahanbei musu ligía duna tuma, aba tíchugun lun. Ábati tidin adabura bandi duna houn sun kameyu mágürabutiñu hagía. Hǘrüti tuadigimari, ladüga hanarimeti hatun kameyu duna.

Dan le tasurun Rebeka, aba lálügüdünu lumusun Abüraámü ka lan liri túguchi. Álügüdahati giñe anhein gayara lubéi lásügürüni áriebu hábiñe. Aba tariñagun: ‘Betueli núguchibei, ani anihein ubaraü bun wábiñe.’ Subuditi lun lumusun Abüraámü liráü lan meha Naoru Betueli, Naoru le líbiri Abüraámü. Ligía láhuduragunbei eteingirei Heowá luagu lanügüni hábiñoun liduheñu Abüraámü.

Áriebu ligía aba lariñaguni lumusun Abüraámü lun Betueli luma Lawán, le tati Rebeka, ka lan lebunabei luéiyasun. Biángubei ariñagatiñu gayara lan tidin Rebeka lun tamarieidun luma Isaakü. Kati tariñagubei Rebeka dan le hálügüdünbarun? Ariñagatu busentu lan tidin. Larugadunbei aba hawarirun hawagun kameyu aba hagumeseruni limigifen hawéiyasun lun hagiribudun Kanán.

Dan le hachülürünbei, áriebu haali. Aba tarihin Rebeka aban wügüri éibuga fulasurugu. Isaakü wügüri ligía. Aba lagundaarun dan le larihinu Rebeka. Ǘrüwarügügili irumu ásügürüti lárigiñe tounwen Sara to lúguchu, hírugili tárigi. Guentoti aba tínsiñedun Rebeka lun Isaakü saragu, ábaya lagundaarun.

Agumesehani 24:1-67.