YENA unanyingika mwana-pwo yono uli ha chizulie chino? Jina lienyi Rebeka. Haliapwila lunga yoze unayi ni kulitakana nenyi kali Izake. Iye mapwa mukwo-pwo. Kuchi chino chapwile?

Apalahama tato ya Izake yazanga kufupila mwanenyi umwe pwo mupema. Iye kakazangile hanga Izake ambate umwe pwo wa A-Kanana, mumu akwa Kanana te kakuwayila tuzambi a mahuza. Kashika Apalahama yasanyika ndungo yenyi, yamwamba ngwenyi: ‘Yami ngunazange hanga yena uhiluke kuze kwatwama asoko jami ku Hara, hanga unehe umwe pwo wa mwanami Izake.’

Ndungo wa Apalahama yakwata kumi lia tumelu mba yalinga wenyi usuku chinji. Muze iye ahetele ku chihela chize te kwatwama asoko ja Apalahama, iye yamana kusesa lia shima lia meya. Te hi kwapwa chingoloshi, ha maola waze mapwo a mu mbonge te akwiza ni kutaha meya. Hohene ndungo wa Apalahama yaputuka kulemba kuli Yehova ngwenyi: ‘Linga kama ngwo mwana-pwo yoze mataha meya hanga yami ni tumelu jami tunwe apwe yoze yena hiwatongola kupwa pwo lia Izake.’

Hi ha mashimbu akehe Rebeka yeza ni kutaha meya. Hazehene ndungo yeta meya kuli Rebeka hanga anwe, iye yamwaha. Rebeka yaya nawa ni kuswita meya waze anakumbana hanga tumelu eswe anwe. Te mulimo ukalu mumu tumelu kakunwa meya anji.

Muze Rebeka te hahwisa kuhana meya, ndungo wa Apalahama yamuhula jina lia tato. Iye yahula nawa ni te mahasa kupomba ku zuwo lio. Rebeka yamba ngwenyi; ‘Tata jina lienyi Betuele, nawa ku zuwo lietu kuli chihela hanga yena upombe.’ Ndungo wa Apalahama te kananyingika ngwo Betuele kali mwana wa Nehor mwana-kwo ya Apalahama. Kashika iye yaliumba hashi hanga asakwile kuli Yehova ha kumusongwela kuli asoko ja Apalahama.

Ha ufuku uze wene, ndungo wa Apalahama yalweza kuli Betuele ni kuli Lapane ndumbu wa Rebeka yize yinakamunehako. Ayo eswe yatayiza ngwo Rebeka aye nenyi hanga akalimbate ni Izake. Kuchi Rebeka anakakumbula muze anakamuhula? Iye yakumbulula ngwenyi, ‘Ewa,’ munguya. Kashika, ha tangwa lize linakasuloho ayo yanyina ha tumelu jo yalinga wenyi usuku hanga afune ku Kanana.

Muze ayo ahetele, te hi kwapwa kulu chingoloshi. Rebeka yamona umwe lunga kanende mu wande. Te Izake. Iye yawahilila chinji ha kumona Rebeka. Chize muze afwile Sara, naye ya Izake te hikwapalika miaka yitatu, nihindu iye te uchili ni yinyengo. Alioze, Izake yaputuka kuzanga chinji Rebeka, nawa yawahilila chinji