NTE ỌMỌFIỌK enye oro n̄wan emi ke ndise edide? Enyịn̄ esie edi Re·bekʹah. N̄ko eren oro enye edide ndisobo edi Isaac. Enye eyekabade edi n̄wan esie. Didie ke emi okotịbe?

Ọfọn, Abraham, ete Isaac okoyom eti n̄wan ọnọ eyen esie. Enye ikoyomke Isaac ọdọ kiet ke otu iban Caʹnaan, koro mbon oro ẹkekpono mme nsunsu Abasi. Ntre Abraham okokot eyenufọk esie ọdọhọ ete: ‘Nnyom fi afiak aka ebiet iman mi ẹdude ke Haʹran onyụn̄ ada n̄wan ọsọk eyen mi Isaac.’

Iwiwa, eyenufọk Abraham akada camel duop aka anyan isan̄ oro. Ke enye ekperede ebiet oro iman Abraham ẹkedụn̄de, enye ekebet ke obube mmọn̄. Ekedi ufọt uwemeyo, ini oro iban ke obio oro ẹwọrọde ẹdibọ mmọn̄ ke obube mmọn̄ oro. Ntre eyenufọk Abraham ama ọbọn̄ akam ọnọ Jehovah: ‘N̄wan oro ọbọde mmọn̄ ọnọ mi ye mme camel akpakam edi enye oro afo emekde edi n̄wan Isaac.’

Ibịghike Re·bekʹah ama edi ndibọ mmọn̄. Ke eyenufọk Abraham eben̄ede enye mmọn̄ ndin̄wọn̄, enye ama ọnọ enye. Ndien enye ama ọbọ mmọn̄ ọnọ kpukpru camel oro itọn̄ asatde. Oro ekedi akamba utom koro mme camel ẹsin̄wọn̄ ata ediwak mmọn̄.

Ke Re·bekʹah ama akanam emi ama, eyenufọk Abraham obụp enye enyịn̄ ete esie. Enye n̄ko ama obụp mme imọ imekeme ndidan̄ eyo esiere ke ufọk mmọ. Enye ama ọdọhọ: ‘Ete mi edi Be·thuʹel n̄ko ufan̄ odu ọnọ fi ndidan̄ ye nnyịn. Eyenufọk Abraham ama ọdiọn̄ọ ete ke Be·thuʹel ekedi eyen eyeneka Abraham, Nahor. Ntre enye ama ọtọn̄ edọn̄ ọkọm Jehovah ke ndida enye n̄kosịm iman Abraham.

Okoneyo oro eyenufọk Abraham akasian Be·thuʹel ye eyeneka Re·bekʹah eren, Laban ntak enye ekedide. Mmọ mbiba ẹma ẹnyịme ete Re·bekʹah etiene ọkọdọ Isaac. Re·bekʹah eketịn̄ nso ke ini ẹbụpde enye? Enye ọkọdọhọ, ‘Ih,’ imọ ikoyom ndika. Ntre, ndan̄ nsiere oro, mmọ ẹkedọk camel, ẹtọn̄ọ anyan isan̄ oro ẹfiak ke Caʹnaan.

Ke ini mmọ ẹkesịmde, ekedi mbubreyo. Re·bekʹah ama okụt owo asan̄ade ke an̄wa. Ekedi Isaac. Enye ama adara ndikụt Re·bekʹah. Eka esie Sarah ama akpa isua ita kpọt ebede, ndien enye ke ọkọfụhọ oro. Edi, ke emi, Isaac ama edima Re·bekʹah etieti, ndien enye ama afiak okop inemesịt.