O KILA se o cei na yalewa oqori? Na yacana o Repeka. E lako tiko mai vei Aisake me rau sa na veiwatini. A yaco vakacava oqo?

A vinakata o Eparama e dua na yalewa vinaka me wati Aisake na luvena. A sega ni vinakati ira na yalewa ni Kenani baleta nira qaravi kalou lasu. Sa qai kaya vua nona dauveiqaravi o Eparama: ‘Lako vei ira na wekaqu i Karana mo lai kauta mai kina e dua na wati Aisake.’

Sega ni bera na dauveiqaravi ni sa lako yani kei na tini na kameli ina vanua yawa oqo. Ni sa voleka yani ina nodra itikotiko na weka i Eparama, a lai vakacegu toka ena dua na ikeliwai. Sa yakavi mai oqo na gauna era dau mai taki wai kina na yalewa. A masulaka vei Jiova na dauveiqaravi i Eparama: ‘O koya ga na yalewa ena vagunuvi au kei ira na kameli, au na kila ni o ni sa digia me wati Aisake.’

Sega ni dede sa mai taki wai o Repeka. Ni kere wai na dauveiqaravi, a solia vua qai vagunuvi ira kece tale ga na kameli era karamaca tu. E dua toka na cakacaka levu oqo nira dau gunu wai sara vakalevu na kameli.

Ni cakava oti oqori o Repeka, e tarogi koya sara na dauveiqaravi i Eparama se o cei na yaca i tamana. A kerea tale ga ke rawa ni moce ena nodratou vale ena bogi oya. E sauma: ‘Na tamaqu o Pecueli, e levu tale tu ga vei keitou na vanua mo dou moce kina.’ A kila tiko na dauveiqaravi i Eparama ni o Pecueli na luve i Neori na taci Eparama. Sa qai tekiduru me vakavinavinaka vei Jiova ni vakaraitaki ira na weka i Eparama vua.

Ena bogi tiko ga oya e tukuna kina na dauveiqaravi vei Pecueli kei Lepani na gane i Repeka na ka a talai yani kina. Rau vakadonuya sara me kauti Repeka me lai wati Aisake. Na cava a kaya o Repeka? E kaya, ‘Io, au sa na lako.’ Ena siga ga e tarava rau vodo kameli lesu tale ena dua na ilakolako balavu i Kenani.

Ni rau yaco yani sa yakavi na vanua. A raica sara o Repeka ni dua na tagane e veilakoyaki tiko ena were. Oqori o Aisake. Se rarawataka tiko na mate i tinana o Sera ena tolu na yabaki sa oti. Ia e marau tale ni rau sa sota kei Repeka, mani domoni koya sara vakalevu.