AMMOM kadi no asino ti babai nga adda iti retrato? Rebecca ti naganna. Ket ti lalaki a maiyam-ammo kenkuana isu ni Isaac. Ni Rebecca agbalin nga asawana. Kasano a napasamak daytoy?

Kayat ni Abraham nga ama ni Isaac a makaala ti nasayaat nga asawa para iti anakna. Gapuna inawaganna ti adipenna ket kunana: ‘Kayatko nga agsublika kadagiti kakabagiak idiay Haran ket iyalaam ni Isaac nga anakko ti asawana.’

Dagus a nangala ti adipen ni Abraham ti sangapulo a kamelio ket napanen. Idi asidegen idiay Haran nagsardeng iti bubon. Oras idi a dagiti babbai ti siudad sumakdoda idiay bubon. Ket nagkararag ken Jehova ti adipen ni Abraham: ‘Sapay koma ta ti babai a mangsakdo ti danum para kaniak ken dagiti kamelio isu met ti piliem nga agbalin nga asawa ni Isaac.’

Idi kuan umayen ni Rebecca a mangala ti danum. Idi dimmawat daydiay adipen ti mainum kenkuana, isut’ inikkanna. Kalpasanna nangted ti danum kadagiti amin a mawawan a kamelio. Nadagsen a trabaho dayta, ta adut’ danum nga inumen dagiti kamelio.

Kalpasan daytoy, isu ti sinaludsodan ti adipen ni Abraham no asino ti nagan ni amana. Sinaludsodna met no mabalinna ti umian idiay balayda. Kuna ni Rebecca: ‘Ni Betuel ti amak, ken adda lugar a paggianam idiay balaymi.’ Ni Betuel ket kaanakan ni Abraham. Gapuna nagyaman ti adipen ni Abraham ken Jehova gaput’ panangiturongna kenkuana kadagiti kabagian ni Abraham.

Iti dayta a rabii imbaga ti adipen ni Abraham ken ni Betuel ken ni Laban a kabsat ni Rebecca no apay nga immay. Immanamongda a dua a kumuyog ni Rebecca kenkuana ket agbalin nga asawa ni Isaac. Situtulok met ni Rebecca a mapan. Iti sumaruno nga aldaw rinugianda ti atiddog a biahe nga agturong Canaan.

Idi sumangpetda rumabiin. Nakita ni Rebecca a magmagna ni Isaac iti kataltalonan. Isut’ maragsakan a makakita ken ni Rebecca. Ni Sara a nanangna ti tallo a tawen a natayen, ket isut’ maladingitan pay. Ngem ita inayat ni Isaac unay ni Rebecca, ket isut’ maragsakan manen.