TAQSIṬ TIS 16

Zzwaǧ n Isḥaq

TEẒRIḌ anta-​ţ tmeṭṭut-​agi? Isem-​is Ribka. Argaz-​agi iɣer i tleḥḥu d Isḥaq. Ribka aţ-​ţuɣal ţ-​ţameṭṭut-​is. Amek i d-​yeḍra waya?

Abṛaham, baba-​s n Isḥaq, yebɣa a d-​yawi tameṭṭut n lɛali i mmi-​s. Ur yebɣi ara ad yezweǧ mmi-​s Isḥaq neţţa d yiwet si tlawin n Kanɛan axaṭer ţɛebbident iṛebbiten n lekdeb. Ɣef wayagi i gessawel Abṛaham i uqeddac-​is, yenna-​yas: ‘Bɣiɣ aţ-​ţuɣaleḍ ɣer Ḥaṛan, ɣer tmurt n imawlan-​iw, akken a d-​tawiḍ tameṭṭut i mmi.’

Imiren kan, aqeddac n Abṛaham yeddem ɛecṛa ileɣman, ikker ad yeṭṭef abrid s lebɛid. Mi gewweḍ ɣer tama n temdint anda ţɛicin imawlan n Abṛaham, yeqqim ɣer yiwen lbir, di lawan n lmeɣreb, mi d-​ţeffɣent tlawin ad agment. Ihi aqeddac n Abṛaham yeẓẓull Yahwa, yenna-​yas: ‘Tameṭṭut ara iyi-​d-​yefken aman i nekk d ileɣman-​iw, ţ-​ţinna i textaṛeḍ aţ-​ţuɣal ţ-​ţameṭṭut n Isḥaq!’

Cwiṭ kan tusa-​d Ribka aţ-​ţagem. Mi s-​yessuter uqeddac-​nni aman, tefka-​yas ad isew. Umbeɛd tuzzel a d-​tagem aman i ileɣman-​nni meṛṛa i gcaḍen si fad. Ccɣel-​agi yesɛa aṭas n leɛtab axaṭer ileɣman tessen aṭas aṭas n waman.

Mi tekfa Ribka ccɣel-​a, isteqsa-​ţ uqeddac n Abṛaham anwa i d baba-​s. Iḍleb-​as daɣen ma yezmer ad yens deg wexxam n baba-​s. Terra-​yas: ‘Baba d Batwil yerna nesɛa amkan anda ara tenseḍ.’ Aqeddac-​nni yeẓra belli Batwil d mmi-​s n Naḥur, gma-​s n Abṛaham. Ɣef wannect-​a i gekna, icekkeṛ Yahwa imi i t-​id-​iwwi ɣer wid i geţţilin i Abṛaham.

Iḍ-​nni, aqeddac n Abṛaham issefhem i Batwil akk-​d Laban, gma-​s n Ribka, acu i t-​id-​yewwin. Qeblen di sin yid-​sen aţ-​ţṛuḥ Ribka yid-​es akken aţ-​ţezweǧ neţţat d Isḥaq. Acu i sen-​d-​terra Ribka mi ţ-​cawṛen? Tenna: ‘Ih, qebleɣ ad dduɣ.’ Azekka-​nni, rekben meṛṛa ɣef ileɣman akken ad uɣalen ɣer tmurt n Kanɛan.

Leḥqen s axxam lewhi n tmeddit. Ribka twala yiwen wergaz ileḥḥun di lexla. D Isḥaq. Isḥaq yefṛeḥ mliḥ mi ţ-​iwala. Yemma-​s Ṣara temmut tlata iseggasen uqbel, meɛna yeggumma ad yeṣber fell-​as. Lameɛna tura, Isḥaq iḥemmel Ribka, dɣa yuɣal-​ed lfeṛḥ ɣer wul-​is.

Laṣel n ddunit 24:1-67.