NDAI sumla na numsha gaw, kadai re ai hpe chye a ni? Shi a amying gaw Rebeka re. shi sa hkrum ai lasha gaw, isak re. Shi gaw Isak a madu jan tai na ra ai. Kaning rai byin wa ai kun?

Ndai hku re. Isak a kawa Abraham gaw, shi a shadang sha a matu, myit su ai num langai mi la ya mayu ai. Hkanan mung na masha ni gaw, shut ai karai ni hpe nawku ma ai majaw, dai mung kaw na anum ni hte, Isak hpe, n kam la ya ai. Dai majaw Abraham gaw, shi a mayam wa hpe shaga nna: ‘Nye a baw sang ni nga ai Haran mare de, sa nna, nye a shadang sha Isak a matu anum langai mi sa woi wa shangun mayu ai.’ nga nna tsun ai.

Abraham a mayam mung, gawla- uk shi hte, sum tsan bu hkawm sa wa ai. Abraham a baw sang ni nga ai shara hte ni wa ai shaloi, hka htung langai mi a makau e sa hkring ai. Mare kaw na shayi sha ni gaw shana de na aten hta, hka htung de hka ja sa wa ai aten re. Dai majaw Abraham a shangun ma gaw: ‘ngai hte nye a gawla-uk ni hpe, ntsin jaw lu ai num sha gaw, Isak a matu nang madu lata san tawn da ai, num sha rai u ga’ nga nna, Yehowa kaw akyu phyi ai.

Dai hpang gade nna yang, Rebeka gaw hka ja na matu sa wa ai. Mayam wa mung ntsin hpyi lu ai hte, shi mung ntsin jaw ai. Dai hpang hpang gara ai, gawla-uk ni hpe mung, ntsin hkru hkra jaw lu ai. Ndai gaw loi ai n re, gawla-uk ni gaw ntsin lu yang, law law lu chye ai majaw re.

Gawla-uk ni hpe Rebeka gaw ntsin jaw lu ngut ai hpang, Abraham a mayam kaw shi a kawa a amying hpe, san wu ai. Bai nna shanhte a nta kaw e manam lu na kun? nga nna mung san ai. Dai shayi sha tsun ai gaw: ‘nye wa gaw Behtuel re; anhte a nta e shingbyi na shara mung nga ai’ nga nna bai htan ai. Behtuel gaw, Abraham a kahpu Nahura a kasha re ai lam hpe, Abraham a mayam chye ai. Dai rai nna, shi hpe Abraham a baw sang ni kaw e, lam madun ya ai majaw lahput hput di nna, Yehowa a chyeju hpe shakawn ai.

Dai shana e, Abraham a mayan wa gaw, shi hpa majaw sa wa ai lam hpe Behtuela hte Rebeka a kayung Laban hpe, tsun ai. Rebeka gaw, shi hte hkan nang nna, Isak hte hkungran na matu, shan lahkawng myit hkrum ma ai. Nang myit lu ai gaw gara hku re ani? nga nna san yang, Rebeka hpa tsun ani? ‘Ngai mung hkraw nngai; hkan nang mayu ai;’nga nna bai htan ai. Dai rai nna, hpang shani e, gawla-uk hpe jawn nna, Hkanan mung de sumtsan lam, bai hkawm wa ma ai.

Shanhte du wa ai aten gaw shana de maga rai sai. Hkauna pa kaw e, lam hkawm nga ai masha langai mi hpe Rebeka mu ai. Dai wa gaw Isak re. Isak mung Rebeka hpe mu yang gabu ai. Isak a kanu si ai masum ning du wa timung, shi naw yawn nga ai. Raitimung ya Isak gaw, Rebeka hpe na chying tsawra nna, myit bai pyaw mat sai.