MA NAKAANAW ani li ixq ut li winq wankebʼ saʼ li eetalil? Aʼan li xRebeca ut laj Isaac. Li xRebeca kikanaak choʼq rixaqil laj Isaac. Qatzolaq chanru kikʼulmank aʼin.

Laj Abrahan kiraj jun chaabʼil ixq choʼq re laj Isaac. Inkʼaʼ kiraj naq tsumlaaq rikʼinebʼ laj Canaan, xbʼaan naq aran nekeʼxloqʼoni li pechʼbʼil yos. Joʼkan naq laj Abrahan kixye re li xmoos: ‹Nawaj naq tatxik rikʼinebʼ linkomon, saʼ li tenamit Haran ut saʼ xyanqebʼ taasikʼ rixaqil li walal›.

Joʼkan naq li moos kixchap xbʼe ut kixkʼam lajeebʼ chi kameey. Naq wulak re li moos saʼ li tenamit Haran, kihilank chire jun li bʼekbʼil haʼ. Ak xʼewuuk naq ebʼ li ixq kohebʼ risinkil xhaʼ. Joʼkan naq li moos, kitzʼaamank chiru li Jehobʼa ut kixye re: ‹Li ixq li tinxkʼe chi ukʼak ut tixkʼe ajwiʼ rukʼaʼebʼ linkameey aʼan taxaq tkanaaq choʼq rixaqil laj Isaac›.

Chirix chik aʼan, kiwulak xRebeca chi risinkil xhaʼ. Li moos kixpatzʼ xhaʼ re xRebeca. Aʼan kixkʼe chi ukʼak li moos ut kixkʼe ajwiʼ chi ukʼak ebʼ li kameey xbʼaan naq teʼchaqik re. Ebʼ li kameey naabʼal haʼ nekeʼrukʼ, joʼkan naq li xRebeca kixkʼe xchʼool chi risinkil naabʼal li haʼ.

Naq li xRebeca kiraqeʼk xkʼeebʼalebʼ xhaʼ li kameey, li moos kixpatzʼ re ani li xyuwaʼ ut ma naru tkanaaq chi wark saʼebʼ li rochoch. Li xRebeca kixye: ‹Laaʼin xrabʼin laj Betuel ut naru tatkanaaq saʼ qochoch›. Li moos naxnaw naq laj Betuel ralal laj Nacor. Laj Nacor ut laj Abrahan riitzʼinebʼ ribʼ. Joʼkan naq li moos kixwiqʼibʼ ribʼ ut kixbʼanyoxi re li Jehobʼa, xbʼaan naq aʼan kikʼamok re rikʼinebʼ li xkomon laj Abrahan.

Saʼ li qʼoqyink ajwiʼ aʼan li xmoos laj Abrahan kixye re laj Betuel ut re laj Laban, ras li xRebeca, kʼaru aj e naq kiwulak rikʼinebʼ. Laj Betuel ut laj Laban keʼxye naq naru tixkʼam xRebeca choʼq rixaqil laj Isaac. Kʼaru kixye xRebeca naq kipatzʼeʼk re aʼin? Li xRebeca kixye naq traj xik chirix li moos. Ut naq kisaqewk keʼsutqʼiik Canaan.

Ak yook chi ok li qʼoqyink naq keʼwulak Canaan. Li xRebeca kiril naq laj Isaac yook chaq chi chalk. Kʼajoʼ naq kisahoʼk saʼ xchʼool laj Isaac naq kiril xRebeca. Toj ra saʼ xchʼool laj Isaac, xbʼaan naq oxibʼ chihabʼ xkamik li xnaʼ. Abʼan, naq kisumlaak rikʼin xRebeca kisahoʼk wiʼ chik saʼ xchʼool.