NANCHI wamuyuka uno mwanamukazhi uji papo pa kipikichala nyi? Jizhina janji Libeka. Ne mwanamulume ubena kumutundaila ke Izaka. Uno mwanamukazhi ye waalukile mukazhanji. Nanchi kino kyajinga byepi?

Abalahama shanja Izaka wakebejile mwananji mwanamukazhi wawama. Kechi wakebelenga Izaka kusongola mwanamukazhi wa mu banabakazhi ba mu Kenana ne, mambo bano bantu bapopwelanga balesa ba bubela. Onkao mambo Abalahama waichile kalume wanji ne kumwambila’mba: ‘Mbena kukeba ubwele ku balongo bami bekala ku Halana ne kumusalulwilako mukazhi mwanami Izaka.’

Ponkapotu kalume wa kwa Abalahama wasendele bangamela jikumi ne kuya lwendo lwalepele bingi. Byo afikile kwipi na mpunzha yaikalangako balongo ba kwa Abalahama, waimene ku mushima. Kyajinga kimye kya mabanga, kyo kimye kyaishilangamo banabakazhi ba mu yewa muzhi na kutapula mema ku mushima. Kalume wa kwa Abalahama walombele kwi Yehoba amba: ‘Mwanamukazhi usakumpapo mema kabiji ne kupapo bangamela mema awa ye mwanamukazhi ye mwatongwela Izaka.’

Kechi pabanjile ne kubandatu ne, Libeka wasolomokele ne kwiya na kutapula mema. Kalume byo alombele mema a kutoma, uno kamwale wamupele. Kepo atapwile ne kutomesha bangamela bonse bajinga na kilaka. Uno wajinga mwingilo wakosa bingi mambo bangamela batoma mema avula bingi.

Libeka byo apwishishe kuba bino, kalume wa kwa Abalahama waipwizhe jizhina ja bashanji uno kamwale. Kabiji wamwipwizhe inge kya kuba wakonsheshe kulaala ku nzubo kwabo. Kamwale waambile’mba: ‘Batata ba Betwela, ne nzubo ya kulaalamo anweba ko iji.’ Kalume wa kwa Abalahama wayukile’mba Betwela wajinga mwana Nahola kolojanji Abalahama. Kepo afukamine ne kumusanchila Yehoba mambo wamutangijile ku balongo ba kwa Abalahama.

Abwa bufuku kalume wa kwa Abalahama waambijile Betwela ne kolojanji Libeka aye Labanyi kine kintu kyo aendejile. Bonse babiji baitabile kuba’mba Libeka aye nanji ne kuya na kukasongolwa kwi Izaka. Nga Libeka waambilepo’mba ka byo bamushikishe? Waambile’mba, ‘Ee,’ naswa kuya. Juba jalondejilepo baimene lwendo lwalepele bingi na bangamela babo kubwelamo ku Kenana.

Bakafikile mu kimye kya mabanga a bufuku. Libeka wamwene mwanamulume saka enda mungye. Wajinga Izaka. Izaka watemenwe bingi pa kumona Libeka. Papichile myaka isatu kufuma pafwijile inanji Sala, kabiji wakijinga na kinyenge. Bino Izaka waishile kumutemwa bingi Libeka, ne kino kyamuletejile lusekelo ne jikwabo.