ပူ ၁၆
အံၤစဲးမၤန့ၢ် မါလၢအဂ့ၤတဂၤ အဂ့ၢ်
ပိာ်မုၣ်လၢအအိၣ်လၢ တၢ်ဂီၤပူၤန့ၣ် မ့ၢ်မတၤလဲၣ်နသ့ၣ်ညါဧါ. အမံၤမ့ၢ်ဝဲ ရံးဘကၤလီၤ. ပှၤလၢအလဲၤထံၣ်အီၤန့ၣ် မ့ၢ်အံၤစဲးလီၤ. အဝဲကကဲထီၣ် အံၤစဲးအမါန့ၣ်လီၤ. တၢ်အံၤ ဟဲကဲထီၣ်ဝဲဒ်လဲၣ်.
ဒ်အံၤဘီၣ်, အံၤစဲးအပါပၢ်အၤဘြၤဟၣ်န့ၣ် အဲၣ်ဒိးဃုန့ၢ်အဖိခွါအမါလၢအဂ့ၤတဂၤလီၤ. ပှၤလၢအအိၣ်လၢကီၢ်ကနၤဧၣ်တဖၣ်န့ၣ် မ့ၢ်လၢအဘါယွၤလၢအကမၣ်တဖၣ်အဃိ တအဲၣ်ဒိးဒုးအိၣ်ဃုာ်အံၤစဲးလၢ ပိာ်မုၣ်ဝဲန့ၣ်တဖၣ်န့ၣ်ဘၣ်. ဒ်န့ၣ်အဃိ အၤဘြၤဟၣ်ကိးအကုၢ်ဒီးစံးဝဲ, ‘ယအဲၣ်ဒိးနကလဲၤဆူ ယဘူးယတံၢ်တဖၣ်လၢ အအိၣ်လၢဝ့ၢ်ဟၤရၣ်ဒီး ဟဲက့ၤကိးန့ၢ်ပိာ်မုၣ်တဂၤ လၢယဖိခွါအံၣ်စဲးအဂီၢ်န့ၣ်လီၤ.’
တဘျီဃီန့ၣ် အၤဘြၤဟၣ်အကုၢ် ဟံးထီၣ်ကီၤလၤအူး အဒုတဆံဒီး လဲၤတၢ်လဲၤဖးထီန့ၣ်လီၤ. ဖဲအတုၤဝဲဆူ အၤဘြၤဟၣ်အဘူးအတံၢ် အိၣ်တၢ်လီၢ်အကပၤဒီး အိၣ်ပတုာ်ဝဲဖဲ ထံပူၤတပူၤအကပၤန့ၣ်လီၤ. မ့ၢ်ဝဲဒၣ်ဖဲမုၢ်ဃ့ၢ်လီၤအကတီၢ်ဒီး ပှၤပိာ်မုၣ်ဖိ လၢဝ့ၢ်ပူၤတဖၣ် ဟဲဒၢၣ်ထံလၢထံပူၤန့ၣ်လီၤ. တုၤနုၤတစု, အၤဘြၤဟၣ်အကုၢ်န့ၣ် ဃ့ထီၣ်တၢ်ဆူယဟိဝၤအအိၣ်, စံးဝဲဒၣ်, ‘ပိာ်မုၣ်ဖိလၢအဒုးအီယၤဒီး ယကီၤလၤအူးတဖၣ်ထံတဂၤန့ၣ် မ်အကမ့ၢ်ပိာ်မုၣ်ဖိလၢ နဃုထၤအီၤ လၢအံၤစဲးအဂီၢ်န့ၣ်တက့ၢ်.’ န့ၣ်လီၤ.
တယံာ်ဘၣ်ဒီး ရံးဘကၤဟဲဝဲဒ်သိးကဒၢၣ်ထံလီၤ. ဖဲအၤဘြၤဟၣ်အကုၢ်ဃ့အီထံအခါ အဝဲဒၣ်ဟ့ၣ်ဒိးအီထံလီၤ. ဝံၤဒီး ဒၢၣ်န့ၢ်ဝဲကဒီးထံလၢ ကီၤလၤအူးလၢတၢ်သူအသးလၢထံတဖၣ်အဂီၤ တုၤအလၢစ့ၢ်ကီးလီၤ. တၢ်အံၤတမ့ၢ်တၢ်မၤလၢအညီဘၣ်. ဘၣ်မနုၤအဃိလဲၣ်န့ၣ် ကီၤလၤအူးတဖၣ်မ့ၢ်အီထံန့ၣ် အီဝဲသ့ၣ်အါဒိၣ်မးအဃိလီၤ.
ဖဲရံးဘကၤဒုးအီကီၤလၤအူးတဖၣ်ထံဝံၤအခါ အၣ်ဘြၤဟၣ်အကုၢ် သံကွၢ်ဝဲအပၢ်အမံၤန့ၣ်လီၤ. ဝံၤဒီး သံကွၢ်ဝဲစ့ၢ်ကီးလၢ ကအိၣ်ပတုာ်လၢအဟံၣ် ကသ့စ့ၢ်ကီးဧါန့ၣ်လီၤ. အဝဲဒၣ်စံး, ‘ယပၢ်အမံၤမ့ၢ်ဝဲ ဘသူၤအ့လးလီၤ. လၢပဟံၣ်န့ၣ် တၢ်အိၣ်ပတုာ်အလီၢ်အိၣ်ဝဲစ့ၢ်ကီးန့ၣ်လီၤ.’ အၤဘြၤဟၣ်အကုၢ်သ့ၣ်ညါဝဲလၢ ဘသူၤအ့လးမ့ၢ် အၤဘြၤဟၣ်အဝဲၢ်နၤဃိၢ်အဖိခွါလီၤ. တုၤနုၤတစု, တီၤလီၤအခီၣ်လၢဟီၣ်ခိၣ်လိၤဒီး စံးထီၣ်ပတြၤယဟိဝၤအဘျုးအဖှိၣ် လၢအဆှၢအီၤဆူ အၤဘြၤဟၣ်အဘူးအတံၢ်အအိၣ် အဃိန့ၣ်လီၤ.
ဖဲမုၢ်ဟါအဝဲန့ၣ် အၤဘြၤဟၣ်အကုၢ်စံးဘၣ်တဲဘၣ် ဘသူၤအ့လးဒီး ရံးဘကၤအဝဲၢ်လၤဘၣ် လၢဘၣ်မနုၤအဝဲဘၣ်ဟဲဝဲအဂ့ၢ်အကျိၤန့ၣ်လီၤ. အဝဲသ့ၣ်ခံဂၤလိာ်န့ၣ် ဘၣ်အသးလၢ ရံးဘကၤကလဲၤပိာ်အခံဒီး ကဒိးတ့ဒိးဖျီအသးလၢအံၤစဲးန့ၣ်လီၤ. ဖဲရံးဘကၤဘၣ်တၢ်သံကွၢ်အီၤအခါ စံးဆၢက့ၤဝဲဒ်လဲၣ်. စံးဝဲဒၣ်လၢ ‘အၢၣ်, ယအဲၣ်ဒိးလဲၤပိာ်’ န့ၣ်လီၤ. ဒ်န့ၣ်ဒီး လၢခံတသီန့ၣ် အဝဲသ့ၣ်ဒိးထီၣ်ကီၤလၤအူးဝံၤ ဟးထီၣ်က့ၤဆူ ကီၢ်လၢအယံၤကနၤဧၣ်န့ၣ်လီၤ.
ဖဲအတုၤဝဲအခါ ဟါခီလီၤဝဲဒၣ်လံန့ၣ်လီၤ. ရံးဘကၤထံၣ်ဝဲပှၤတဂၤ ဟးလၢပျီပူၤန့ၣ်လီၤ. အဝဲဒၣ်မ့ၢ်အံၤစဲးလီၤ. ပှၤအံၤဖဲအထံၣ်ဘၣ် ရံးဘကၤအခါအသးခုဝဲဒၣ်န့ၣ်လီၤ. အမိၢ်သံန့ၣ် ယံာ်တ့ၢ်သၢနံၣ်လံဘၣ်ဆၣ် အသးအုဒံးဝဲန့ၣ်လီၤ. ခဲအံၤ အံၤစဲးအဲၣ်ရံးဘကၤ ဒိၣ်နးမးအဃိ ဟဲက့ၤသးဖှံထီၣ်က့ၤဝဲဒၣ်န့ၣ်လီၤ.
တၢ်ဂ့ၤအဂၤလၢ နကဘၣ်သး
သိၣ်လိနဖိတဖၣ် တက့ၢ်
နီၢ်ရံးဘကၤ အဲၣ်ဒိးမၤသးခု ယဟိဝၤယွၤအသး
ပမၤဒ်သိးဒီး နီၢ်ရံးဘကၤ ကသ့ဒ်လဲၣ်. ဖးတၢ်တဲပူ ဒီးမၤလိအါထီၣ် အဝဲအဂ့ၢ်တက့ၢ်.
