MPANJI 16

Isaka Nasumbuli Mumbanda Wamuwahi

WUNAMWILUKI iwu mumbanda wudi hamwevulu? Ijina dindi diyi Rebeka. Iwu iyala wunakwinza nakudibulakanayi nindi diyi Isaka. Rebeka wukwikala iñoda Isaka. Indi ichi chazatikili ñahi?

Tata yaIsaka Abarahama wakeñeleña kumusumbwila mwanindi mumbanda wamuwahi. Hakeñeleña Isaka kusumbula mumbanda wamuKenaniku, muloña awantu adiña nakudifukula kudi tunzambi twakutwamba. Dichi Abarahama watambikili ñamba yindi nakumuleja nindi: ‘Nakukeña wuyi kwashakamaña antaña jami kuHarana wukamusumbwili mwanami Isaka mumbanda.’

Hohenohu ñamba yaAbarahama wanoneli angameli ikumi nakukasa lwendu. Chashikiliyi kwakwihi neluña kwashakamineña antaña jaAbarahama, wemeni heshima damenji. Kwadiña kwela dehi melela, mpinji yenzañawu ambanda amumusumba kwishima nakutaha menji. Dichi ñamba yaAbarahama walombeli kudi Yehova nindi: ‘Mwani yowu mumbanda wukunyinka menji hamu niangameli diyi yiwunatondi kwikala iñoda Isaka.’

Chakubula kuhita mpinji, Rebeka wenjili nakutaha menji. Chamulombeliyi ñamba menji, wamwinkeli. Kutwala muna watahilili niangameli ejima adiña nampwila. Iwu wadiña mudimu wakola muloña angameli anwaña menji amavulu chikupu.

Chamanishiliyi Rebeka kutaha menji, ñamba yaAbarahama wamwihwili ijina datata yindi. Wamwihwili cheñi neyi kwiji watela kukama kwitala dawu. Rebeka wahosheli nindi: ‘Tata yami diyi Betuweli nawa nikwakukama kudi kwoku.’ Ñamba yaAbarahama welukili nindi Betuweli wadiña mwana kaNahori mana kwa Abarahama. Dichi wanoñamini hamaseki nakumusakilila Yehova nanochu chamulombweliyi kudi antaña jaAbarahama.

Wowenowu wufuku ñamba yaAbarahama wamulejeli Betuweli nimana kwa Rebeka Labani mujimbu wenjililiyi. Wejima wawu etejeli nawu Rebeka watela kuya kulonda akasumbuki naIsaka. Rebeka wahosheli nindidi chamwihwiliwu? Wahosheli nindi, ‘Eña,’ wakeñeli kuya. Dichi chikwachili, akandamini hajingameli nakufunta kuKenani.

Ashikili nampinji yamelela. Rebeka wamweni muntu nakwenda mwiha. Wadiña Isaka. Isaka watiyili kuwaha hakumumona Rebeka. Mama yindi Sara wadiña wafwa dehi mwahitili hohu yaaka yisatu nawa wachidiña nachineñi. Ilaña Isaka wamukeñeli Rebeka nankashi, dichi wadiña namuzañalu cheñi.

Kutachika 24:1-67.