¿NEL tnikʼe tiʼj alkye xuʼj tkuʼx toj tilbʼilal? Aju xuʼj lu Rebeca tbʼi. Atzun xinaq jatumel chʼixtl tpon Rebeca atzen Isaacju. A Rebeca kʼokel te t-xuʼjil Isaac. ¿Tzeʼn bʼaja jlu?

Kxel nqʼmaʼne teya, tajtaq Abrahán jun tbʼanel t-xuʼjil tkyʼajal. Nya tajbʼiltoq tuʼn tkubʼ mujeʼ Isaac tukʼe jun xuʼj te Canaán, tuʼnjo nchi kʼulentaq xjal lu kywitz nya axix dios. Tuʼntzunjo, tzaj ttxkoʼn Abrahán tmajen ex xi tqʼmaʼn te kyjalu: ‹Waje tuʼn t-xiʼya jatumel nchi anqʼina xjal at nxilene kyukʼil atz Harán ex ktzajeltzun tiʼna jun t-xuʼjil nkyʼajele Isaac›.

Xitzun tiʼn tmajen Abrahán lajaj kamey ex kubʼtzun toj bʼe. Tej chʼinxteq tpon jatumel nchi anqʼina xjal at kyxilen tukʼe Abrahán, kubʼ ten ttzi jun xoch (pozo). Tej chʼixtaq ttzaj qlolj nche pontaq xuʼj a orju qʼil aʼ tuj xoch. Tuʼntzunjo, xi tqʼamaʼn tmajen Abrahán te Jehová toj naʼj Dios: ‹Aju qʼapoj kyjawitz tiʼn aʼ weye ex kye kamey awtjo jaw tskʼoʼne tuʼn tok te t-xuʼjel Isaac›.

Tojxju ambʼil aju pon Rebeca qʼil aʼ ttzi xoch. Tej t-xi tqanin majen aʼ te tkʼaʼ (tkʼwaʼ), xi tqʼoʼn Rebeca aʼ te. Ax ikx jatz tiʼn nim aʼ kye kykyaqil kamey aʼyejo chʼinxtaq kykyim tuʼn kykʼan aʼ. Nim aqʼunan Rebeca, tuʼnjo nimxix aʼ nbʼaj kyuʼn kamey.

Tej tbʼant jlu tuʼn Rebeca, aju tmajen Abrahán xi tqanen te Rebeca tiʼ tbʼi ttat. Ax ikx xi tqanin qa jakutoq bʼant tuʼn tkyaj jun aqʼbʼel jtal toj kyja. Xi ttzaqʼweʼn Rebeca te: ‹Tmeʼjel Betuel qine, ex at jatumel bʼaʼn tuʼn tkyaje qjaye›. Otaq tbʼi tmajin Abrahán qa a Betuel atzun tkʼwaʼl Nacorju, aju terman Abrahán. Tuʼntzunju, kubʼ mejeʼ ex xi tqʼoʼn chjonte te Jehová tuʼnjo otaq pon tiʼn kyja xjal, aju at kyxilen tukʼe Abrahán.

Tujxjo qonikʼen lu, xi tqʼamaʼn tmajen Abrahán te Betuel ex te Labán, aju t-xibʼen Rebeca, tiquʼn oteq pon kyja. Kyqʼma kykabʼel qa jakutoq txiʼ Rebeca tukʼel ex qa jakuteq mojeʼ tukʼil Isaac. ¿Tiʼ tqʼma Rebeca tej t-xi qanin te? Tqʼma qa tajtaq tuʼn t-xiʼ. Tuʼntzunjo, toj juntl qʼij e jax kyibʼaj kamey ex kubʼ bʼe kyuʼn tuʼn kymeltzʼaj tzmax Canaán.

Chʼixtoq qok yupj tej kypon. Til, mo tlom, Rebeca jun ichin nbʼettaq tuj kojbʼil. Ataq Isaac. Jaw tzalaj tej t-xi tkiʼn Rebeca. Otaqxe tzikʼ oxe abʼqʼi tkyimlen Sara aju ttxuʼ Isaac ex kukxtoq nbʼisin tiʼj. Ok tkʼujlaʼnxix Isaac Rebeca, ex tzalaj juntl maj.