Historia 16

Isaac kinextia se kuajli isiuauj

¿TIKIXMATI yejon siuatl akin nesi ipan tlaixkopinajli? Itoka Rebeca. Niman noijki nikan nesi kenon kinisiuitiuj se tlakatl akin itoka Isaac. Yejuamej nonamiktiskej. ¿Kenon opanok yejuin?

Abrahán, kinekiya ika ikoneuj Isaac manonamikti iuan se kuajli siuatl. Xkinekiya manonamikti Isaac iuan se siuatl akin chanti Canaán, pampa yejuamej kinueyichiuayaj tajtsitsintin. Ika yejon, Abrahán okonots itlakeual niman okijli: ‘Nikneki xuiya kampa chantij akin ken nikimita ne Harán niman xtejtemo se siuatl akin manonamikti iuan nokoneuj Isaac’.

Nimantsin itlakeual Abrahán okinmanato majtlaktli camellos niman oyaj. Ijkuak iajsitiaya kampa chantiyaj akin ken kimita Abrahán, onotelti kampa onkatka se pozo. Yotlapoyaujka, ijkuak siuamej konkuiyaj atl. Ika yejon, itlakeual Abrahán okichiuj se teoyotl niman okijli Jehová: ‘Yejon siuatl akin nechmakas atl niman kimatlitis camellos, yejua yes akin tejua tiktlapejpenis manonamikti iuan Isaac’.

Aman Rebeca ouajla okikuiko atl. Ijkuak itlakeual Abrahán okitlajtlanili atl, yejua okimakak. Kuakon yejua okikuito atl niman okinmatliti camellos akin melak amikiyaj. Chikauak otekit, pampa camellos melak atlinij.

Ijkuak Rebeca otlan, itlakeual Abrahán okitlajtolti kenon itoka itaj. Noijki okitlajtolti tla yejon yeuajli ueliskia noseuis ichan. Yejua okinankili: ‘Notaj itoka Betuel, niman nochan onka kampa uelis timoseuis’. Yejon tlakeuajli kimatiya ika itaj Betuel itoka katka Nacor, niman Nacor ikniuj katka Abrahán. Ika yejon, onotlakuankets niman okitlasojkamachili Jehová pampa okuikak itech akin ken kimita Abrahán.

Ipan yejon yeuajli itlakeual Abrahán okijli Betuel niman Labán, ikniuj Rebeca, tleka oyaj inchan. Omemej okijtokej ika Rebeca ueliskia yas iuan niman manonamikti iuan Isaac. ¿Tlenon okijto Rebeca ijkuak okitlajtoltijkej? Okijto ika kema kinekiya yas. Ika yejon, uajmostla otlejkokej ipan camellos niman oyajkej Canaán.

Ijkuak oajsikej, itlayoua katka. Rebeca okitak se tlakatl akin kistinemiya tepek. Isaac katka. Yejua opak pampa okitak Rebeca. Sara, inan, kemach kipiaya yeyi xiuitl ika omik, niman yejua ok noyolkokouaya ipampa. San ika, aman Isaac melak okitlasojtlak Rebeca, niman oksejpa opak.

Génesis 24:1-67.