OMUHIKUENA ou polutalatu apa umwii? Enyina liae o Rebeka. Omulume mawanena nae o Isake. Rebeka makakala omukai wae. Otyo tyaenda ñgeni?

Abraiau tate ya Isake wahandele okuvasa omukai ondalawa pala omona wae. Ankho kahandele Isake anepe omukai womo Kanaa. Mokonda ovanthu ovo ankho vafenda ono huku mbomatutu. Ngotyo Abraiau waihana omuundapi wae, emupopila okuti: ‘Nahanda ukondoke ko Harã kombunga yange, ukapoleko omukai pala omona wange Isake.’

Omuundapi wa Abraiau wakatuka liwa liwa, apolo omakamelu ekwi, alingi oungendi. Etyi ehika potyilongo tyombunga ya Abraiau, atalama ponthele yonyombo. Ankho okekumbi, puetyi ovakai vomepundaumbo veya okutapa omeva ponyombo oyo. Iya omuundapi wa Abraiau welikuambela ku Yehova okuti: ‘Omuhikuena metavela okumpha omeva ndyinwe, nomakamelu ange, akale omukai ove wakoya pala Isake.’

Pakala vala katutu, akulauka Rebeka wiya okutapa omeva. Etyi omuundapi wa Abraiau emuita omeva okunua, Rebeka emuavela. Konyima atape omaande pala omakamelu ae aeho ankho ankhia ohunga. Ankho ovilinga vimue ovinene, mokonda omakamelu anwa omeva omanyingi.

Etyi Rebeka amana, omuundapi wa Abraiau wemupula enyina lia tate yae. Tupu wemupula inkha apondola okukalala meumbo liavo. Rebeka ati: ‘Tate yange o Mbetuele, tupu upondola okukalala meumbo lietu, muna omphangu. Omuundapi wa Abraiau ankho utyii okuti Mbetuele omona wa Naor ondenge ya Abraiau. Moluotyo, watuika konongolo apandula Yehova, mokonda wemuhongolela kombunga ya Abraiau.

Kounthiki, omuundapi wa Abraiau, atolela Betuele na Labau omphange ya Rebeka, etyi aendela. Aveho avatavela Rebeka akanepwe na Isake. Iya etyi Rebeka apulwa ati wi? Wati, ‘Yoo,’ nahanda okuenda.’ Ngotyo, komuhuka vavelama omakamelu, avalingi oungendi okukondoka ko Kanaa.

Etyi vehika ekumbi ankho linyingila. Rebeka amono omulume umue ankho wendaenda mepia. Ankho o Isake. Iya Isake ahambukwa unene etyi amona Rebeka. Pomuvo opo me ya Isake ankho wanyimale omanima etatu konyima. Ngotyo, Isake ankho nkhele ulila me yae. Mahi, pahe etyi Isake amona Rebeka ahambukwa, mokonda ankho umuhole unene.