WEETST du, wäa de Mejal hia opp dit Bilt es? Daut es Rebecka. Dän Jung, waut see hia bejäajent, es Isaak. See woat sikj met dän befrieen. Woo haft sikj daut romjenomen?

Abraham wull eene goode Fru fa sienen Sän Isaak. Hee wull nich haben, daut Isaak sikj sull met eene Mejal von Kanaan befrieen, wiels de Kanaanita deeden faulsche Jetta aunbäden. Doawäajen roopt Abraham sienen Deena un säd to dän: ‘Go no Haran no mien Frintschoft un sieekj doa eene Fru fa mienen Sän Isaak.’

De Deena neem fuaz tieen Kameelen un muak sikj opp de lange Reis no Abraham sien Frintschoft. Aus hee aul meist bat doa wia, hilt hee bie eenen Wotaborm aun. Daut wia aul jäajen Owent, jroz de Tiet, wua de Frues von de Staut no dän Borm kjeemen Wota holen. Dan deed de Deena to Jehova bäden un säd: ‘Mucht dee Mejal, waut mie un de Kameelen woat Wota jäwen, deejanje sennen, waut du fa Isaak hast to Fru utjewält.’

Boolt kjeem Rebecka doa aun toom Wota holen. De Deena fruach ar no een beskje Wota un see jeef am. Dan jeef see uk aul de Kameelen to drinkjen. Daut wia eene schwoare Oabeit, wiels Kameelen supen sea väl Wota.

Aus Rebecka de Kameelen ieescht aula jedrenkjt haud, fruach de Deena ar, wäms Dochta see wia. Hee fruach uk, aus hee bie an wudd kjennen Nacht bliewen. See säd: ‘Mien Voda heet Betuel, un wie haben uk jenuach Rum, daut du bie ons kaust Nacht bliewen.’ De Deena wist, daut Betuel de Sän von Abraham sienen Brooda Nahor wia. Doawäajen kjneed hee sikj un bedankt sikj bie Jehova, daut dee am haud no Abraham sien Frintschoft jeleit.

Noch dän Zeowes räd Abraham sien Deena met Betuel un met Rebecka äaren Brooda Laban. Hee vetald an, wuarom hee jekomen wia. See wieren beid envestonen, daut Rebecka kunn met dän Deena metgonen un sikj met Isaak befrieen. Waut säd Rebecka doatoo, aus see ar fruagen? See säd: ‘Jo, ekj well metgonen.’ Fuaz näakjsten Dach jeewen see sikj met äare Kameelen opp dän langen Wajch trigj no Kanaan.

Aus see en Kanaan aunkjeemen, wia daut jroz jäajen Owent. Rebecka sach doa eenen Maun oppe Stap. Daut wia Isaak. Isaak freid sikj sea, aus hee Rebecka sach. Siene Mame Sara wia dree Joa trigj jestorwen un hee wia noch emma truarich doaräwa. Oba hee räakjend Rebecka boolt sea väl, un daut muak am wada schaftich.