¿REQSINKICHU kay dibujopi warmita? Sutinmi Rebeca. Tupaykunanpaq risqan qaripa sutinmi Isaac. Rebecam Isaacpa warmin kanqa. ¿Imaynamá chaynaqa karqa?

Abrahamqa allin warmita churin Isaacpaq munarqa. Manam munarqachu Canaanpi warmikunawan Isaac casarakunanta, chay runakunaqa taytacha-mamachakuna yupaychaqmi karqaku. Chaymi Abrahamqa sirviententa qayaspa nirqa: ‘Haran llaqtaytam aylluykunapata rinki hinaspam churiy Isaacpaq warmita horqomunki’ nispa.

Chayllam Abrahampa sirvientenqa chunka camellokunata akllaspan pasarqa. Abrahampa ayllun yachasqan llaqtaman hichparuspanmi pukyu patapi samarirqa. Chay llaqtapi warmikuna pukyumanta yaku horqonanku tardeykuq horasñam karqa. Chaymi Abrahampa sirvientenqa Jehová Diosta mañakuspa nirqa: ‘Yakuta tomachiwaqniy hinaspa camellokunatapas tomachiq sipasyá kachun serviqniki Isaacpaq akllasqayki warmiqa’ nispa.

Rebecaqa chayllamá yaku horqoq hamuchkarqa. Abrahampa sirvienten yakuta tomaykachiway nispa mañakuptinmi, Rebecaqa yakuta tomaykachirqa. Hinaspam Rebecaqa utqayllamanña yakuta horqorqa llapallan yakunayasqa camellokunapaq. Camellokunaqa achka yakuta tomaptinmi achka kutita yakuta horqorqa.

Rebeca yaku horqoyta tukuruptinmi Abrahampa sirvientenqa taytanpa sutinta tapurqa. Tapurqataqmi paykunapa wasinpi samapakunanpaq. Rebecañataqmi nirqa: ‘Betuelpa churinmi kani, wasipiqa campopas kachkanmi samakunaykipaq’ nispa. Abrahampa sirvientenqa yacharqam Betuelqa Nacorpa churin kasqanta, Nacorñataqmi Abrahampa wawqen karqa. Hinaptinmi chay sirvienteqa qonqoranpa kumuykuspa Jehová Diosta adorarqa Abrahampa ayllunkunapa wasinman chayachisqanmanta.

Chay tutam Abrahampa sirvientenqa imaman hamusqanta Betuelman hinaspa Rebecapa turin Labanman willakurqa. Chaymi iskayninku sirvienteta nirqaku Rebecaqa paywan rispa Isaacwan casarakunanpaq. ¿Ima nirqataq Rebecaqa tapuptinku? Arí, risaqmi nispam nirqa. Hinaptinmi, qatiqnin punchawllata camellokunaman sillakuspa illayta qallarirqaku Canaan lawman kutinankupaq.

Tardeykuqtaña Canaan lawman chayarurqaku. Rebecamá campopi purichkaq runata rikururqa. Isaacmi kasqa. Paymi kusirikurqa Rebecata rikuruspa. Isaacpa maman Sarapa wañukusqanmanta kimsa watallaraqmi pasarusqa, chaymi payqa llakisqallaraq kachkarqa. Ichaqa Rebecata llumpayllataña kuyaspanmi kusikurqa.