UYAMATI kutsi ngubani lona lomsikati lombonako kulesitfombe? Ligama lakhe nguRebheka. Lendvodza latawuhlangana nayo ngu-Isaka. Rebheka utawuba ngumfati wayo. Kwenteka kanjani loku?

Abrahama abefuna kutfolela indvodzana yakhe umfati lolungile. Abengafuni kutsi Isaka ashade nalomunye wemadvodzakati aseKhenani, ngobe abekhonta bonkulunkulu bemanga. Abrahama wabita inceku yakhe watsi: ‘Hamba ubuyele eveni lakitsi nasetihlotjeni tami eHarani, ufike utsatsele indvodzana yami Isaka umfati khona.’

Ngekushesha inceku ya-Abrahama yatsatsa emakamela lalishumi, yahamba luhambo loludze. Nayisondzela kulendzawo lapho tihlobo ta-Abrahama betihlala khona, yema eceleni kwesicobho. Besekunguntsambama, sikhatsi emadvodzakati akulendzawo lakha ngaso emanti esicojeni. Inceku ya-Abrahama yathandaza kuJehova yatsi: ‘Akutsi intfombi letawunatsisa mine emanti kanye nemakamela, kube ngiyo loyikhetsako kutsi ibengumfati wa-Isaka.’

Yatsi isengakacedzi kuthandaza, kwase kuchamuka Rebheka atewukha emanti. Nayicela emanti kuye wavele nje wayinatsisa, waphindze wakha lamanye emanti wawanatsisa onkhe emakamela. Lona kwakungumsebenti lomatima ngoba emakamela anatsa emanti lamanyenti.

Kwatsi nasekacedzile Rebheka kunatsisa emakamela, inceku ya-Abrahama yambuta kutsi utalwa ngubani. Yaphindze yambuta kutsi bangayitfola yini indzawo yekulala lena ekhaya kubo. Rebheka wayiphendvula watsi: ‘Ngitalwa nguBethuweli, futsi kunemakamelo lenele leningalala kuwo.’ Inceku ya-Abrahama beyati kutsi Bethuweli utalwa ngumnakabo Abrahama, Nahori. Yaguca phasi yabonga Jehova ngekutsi uyiholile yaze yafika etihlotjeni ta-Abrahama.

Kulobo busuku, inceku ya-Abrahama yatjela Bethuweli naLabani longumnakabo Rebheka indzaba lebekete ngayo. Bobabili bavuma kutsi Rebheka ahambe ayoshada na-Isaka. Watsini Rebheka nabambuta kutsi uyakufuna yini kuhamba? Watsi, ‘Yebo, ngitawuhamba nayo.’ Ngakusasa bakhwela emakamela, bacala luhambo loludze lolubuyela eKhenani.

Befika eKhenani sekunguntsambama. Rebheka watsi nakaphakamisa emehlo wabona indvodza ihamba esigangeni, leyondvodza kwakungu-Isaka. Wajabula Isaka nakabonaRebheka. Phela, Sara abeseneminyaka lemitsatfu afa, kodvwa Isaka abesoloku eva buhlungu enhlitiyweni yakhe. Isaka wamtsandza kakhulu umkakhe Rebheka, futsi loko kwamenta waphindze wajabula.