LÁ NATATSIʼNIIʼ a̱ʼgu̱ bi̱ kamaa náa kiʼniriyaʼ ráʼ. Ikhaa mbiʼyuu Rebeca. Xa̱biya̱ bi̱ náa xtáa ra̱jkha̱ ni̱ndxu̱u̱ Isaac. Ikhaa bi̱ maʼni a̱ʼgiu̱u̱ Isaac. Xú káʼnii nirígá rígi̱ rá.

Abrahán, anu̱u̱ Isaac, nindoo mbáa a̱ʼgu̱ bi̱ májánʼ a̱jkiu̱u̱n mu mbayáa a̱ʼdióo. Táʼndoo rí Isaac manigúnʼ gajmíi̱n gu̱ʼu̱ bi̱ kuwa náa Canaán, numuu rí xa̱bu̱ buʼko̱ nduyamajkún dios bi̱ ragájkhun. Ikha jngó Abrahán nindxa̱ʼóo bi̱ nambáyuu ma̱ngoo niʼthúu̱n: ‹Nandoʼ rí matangaán náa kúwi̱i̱n a̱ngui̱nʼ náa Harán mu mataʼyááʼ mbáa a̱ʼgu̱ bi̱ mbayáa a̱ʼdióoʼ Isaac›.

Núkhu má ikhú bi̱ nambáyuu Abrahán ni̱jkha̱ gágúun gu̱wi̱nʼ camello mu magíʼdu̱u̱ maʼga̱ mitsinguánʼ wéñuʼ. Índo̱ rí na̱jkha̱ maʼga̱nú náa rí kúwi̱i̱n a̱ngui̱i̱n Abrahán, niwi̱ji̱ náa mbá pusu. Na̱jkha̱ má rakína, índo̱ gu̱ʼu̱ bi̱ kuwa náa xuajin nagún gúda iyaʼ náa pusu. Ikha jngó bi̱ nambáyuu Abrahán niʼtákháñu Jeobá: ‹A̱ʼgu̱ bi̱ gáyáaʼ iyaʼ ma̱ga̱nʼ ga̱jma̱a̱ rí muwa̱a̱n camello ikhaa gáʼni bi̱ gátaʼyaaʼ ikháánʼ mu maʼni a̱ʼgiu̱u̱ Isaac›.

Nacha̱ ni̱ʼkha̱ Rebeca mu maʼga̱ gáya iyaʼ. Índo̱ rí xa̱bu̱ bi̱ naguguambá nindo̱ʼo̱o̱ iyaʼ maga̱a̱n, ikhaa nixnúu iyaʼ. Ikhú ikhaa ni̱jkha̱ gáya mba̱ji̱nʼ iyaʼ mu muwa̱a̱n xúgínʼ camello bi̱ nakandawúnʼ. Gakhi̱i̱ wéñuʼ niñajunʼ, numuu rí camello mba̱ji̱nʼ wéñuʼ iyaʼ eʼwa̱a̱n.

Índo̱ Rebeca niguambóo, bi̱ nambáyuu Abrahán niraxu̱u̱ ndí mbiʼyuu anu̱u̱. Ma̱ngoo niraxi á mu rí ma̱ndoo maguanúu mbá mbruʼun náa guʼwún ikhiin. Ikhaa niʼthí: ‹Anu̱ʼ mbiʼyuu Betuel, ma̱ngoo gáʼchu maguanáʼ náa goʼwóoʼ›. Xa̱bu̱ bi̱ nambáyuu Abrahán ndiʼyoo má rí Betuel ni̱ndxu̱u̱ a̱ʼdióo Nacor, ndxájuu Abrahán. Ikha jngó nismbátigo̱o̱ mú maxnáa núma̱aʼ Jeobá numuu rí ni̱jkha̱ kayáa náa a̱ngui̱i̱n Abrahán.

Mbruʼun rúʼko̱ bi̱ nambáyuu Abrahán niʼthúu̱n Betuel ga̱jma̱a̱ Labán, ndxájuu Rebeca, náa numuu ni̱ʼkha̱. Ikhiin nithi dí Rebeca ma̱ndoo maʼga̱ mu mbayáa Isaac. Ndiéjunʼ niʼthí Rebeca índo̱ nixtaxi̱i̱ rá. Niʼthí rí nandoo maʼga̱. Ikha jngó, núkhu má i̱mba̱ néjtsuu nindramiunʼ camello mu mugi̱ʼdi̱i̱ maguwáanʼ mitsinguánʼ wéñuʼ asndu náa Canaán.

Mbruʼun má ni̱ndxu̱u̱, índo̱ niguáʼnu. Rebeca ndiʼyoo mbáa xa̱bu̱ bi̱ ngruámuʼ náa mbá xkua. Ikhaa ninindxu̱u̱ Isaac. Ikhaa nidxuu wéñuʼ índo̱ ndiʼyoo Rebeca. Sara ru̱dúu̱, nikháñu ajtsú tsiguʼ kidíiʼ, ikhaa xóó xtáa gíná ga̱jma̱a̱ numuu rúʼko̱. Mú Isaac ni̱jkha̱nú nindoo kaʼyooʼ wéñuʼ Rebeca, nixtáa gagi mbu̱júu̱.