ÚFA kwase u á lu ken foto heen ne kpa? Iti na er Rebeka. Man or u á lu van her a na ne ka Isaka. Ka u una hingir kwase na. Kwagh ne yange er nena?

Ka shami, ter u Isaka Aberaham yange soo er una zua a kwase u dedoo sha ci u wan na. Yange soo er Isaka a̱ vôso môm ken kasev mba ken Kanaan mbara ga, sha ci u ior mbara ve civir mbaaôndo mbaaiev. Nahan Aberaham yila wanakiriki na kaa a na er: ‘M soo mer za ken tar wam ape ityô yam i lu ken Haran la man za er kwase sha ci u wan wam Isaka.’

Fese je wanakiriki u Aberaham tôô urakumi pue man kôr yemen gôgô gbenda la. Za nyer hen vegher u yange anmgbianev mba Aberaham lu la yô, á tile hen ijôr. Shighe ne lu atetan, shighe u kasev mba ken gar la ve vaan sha u va kesen mngerem hen ijôr la. Nahan wanakiriki u Aberaham er msen hen Yehova er: ‘Ma u ne sha er iniunkwase i ia kese mngerem sha ci wam kua urakumi mban ne la ia lu i ú tsough sha ci u i lu kwase u Isaka yô.’

Ica gba ga tsô Rebeka man va sha u kesen mngerem. Wanakiriki la sen un mngerem ma man yô, a na un je. Tsô shi a za kese mngerem sha ci u urakumi mbara cii sha ci u ve lu imura. Kwagh la lu zegetom sha ci u urakumi ka ve ma mngerem ma ngee kpishi je.

Er Rebeka yange eren kwagh ne been kera yô, wanakiriki u Aberaham man pine un iti i ter na. Shi a pine un aluer ka u una fatyô u tsan hen ya ve yô. A kaa er: ‘Terem ka Betuel, man iyou ngi i ú fatyô u tsan vea vese yô.’ Wanakiriki u Aberaham yange fa e̱r Betuel lu wan u Nahor anmgbian u Aberaham yô. Nahan a gure inya a sugh Yehova sha er á hemen un a va a na hen anmgbianev mba Aberaham yô.

Hen tugh mbura wanakiriki u Aberaham pase Betuel kua Laban anngô u Rebeka ityôkyaa i un va yô. Ve cii ve lumun er Rebeka una fatyô u yemen vea na sha u za vôson Isaka. Kanyi yange Rebeka ôr shighe u i pine un yôô? A kaa er, ‘Een,’ un soo u zan. Nahan sev mbu aven yô man ve henda urakumi tsô ve kôr gôgô gbenda la u hiden yemen ken Kanaan.

Mba za nyer yô, lu aikie. Rebeka nenge a or nan lu zenden ken akôngo. Lu Isaka je la. Yange saan un iyol u nengen a Rebeka. Ngô na Sara kpe anyom kar di atar tsô, nahan lu a ijungwen sha kwagh ne heregh. Kpa hegen Rebeka doo Isaka ishima kpishi je, nahan hide saan un iyol heregh.