16-нҗы хекая

Ысхак говы гелин аляр

БУ ГЫЗЫҢ кимдигини билйәңми? Бу Ребека. Оны гаршылаян йигидиң ады болса Ысхак. Ребека онуң гелни болмалы. Оларың душушмагына нәме себәп болдука?

Ыбрайым оглы Ысхага говы гелин тапып береси гелди. Ол Ысхагың Кенган гызларына өйленмегини ислемеди, себәби олар ялан таңрылара сежде эдйәрдилер. Шонуң үчин Ыбрайым гулуны янына чагырып: «Сениң Харана, гарындашларымың яшаян ерине барып, оглум Ысхага гелин алып гелмегиңи ислейәрин» дийди.

Ыбрайымың гулы дессине он дүйәни алып, узак ёла дүшди. Ол Ыбрайымың гарындашларының яшаян ерине голай бир ерде дүшледи. Агшамара голайлашярды. Шол вагт шәхериң гелин-гызлары гуюдан сув чекмәге гелйәрдилер. Шонуң үчин Ыбрайымың гулы: «Ысхак үчин сайлан гелниң маңа ве дүелериме сув чексин» дийип, Ехова дога этди.

Тизден сув алмага Ребека гелди. Ыбрайымың гулуның сув дилейәнини эшидип, оңа ичмәге сув берди. Соңра гидип дүелере-де сув чекди. Ол көп ишлемели болды, себәби дүелер сувы көп ичйәр.

Ребека сув чекип боланда, Ыбрайымың гулы ондан кимиң гызыдыгыны хем-де өйлеринде гиҗе ятмага ер сорады. Ребека җогап берип: «Мен Бекуэлиң гызы, сизиң үчин бизде ер тапылар» дийди. Ол Бекуэлиң Ыбрайымың доганы Нахорың оглудыгыны билйәрди. Шейдип Ыбрайымың гарындашларыны тапмага көмек эдени үчин, Ехова тагзым эдип миннетдарлык билдирди.

Ыбрайымың гулы шол агшам Бекуэле хем-де Ребеканың доганы Лабана нәме үчин гелендигини гүррүң берди. Оларың икиси-де Ребеканың Ысхага дурмуша чыкмагына разы болдулар. Эмма Ребекадан соранларында, нәме дийдикә? Хава, олам разы болды. Эртеси гүн олар дүелере мүнүп, ызына, узак ёла Кенгана уградылар.

Олар өйүне агшама голай гелдилер. Шонда Ребека аңырдан гелйән бир йигиди гөрйәр. Бу Ысхакды. Ол Ребеканы гөрүп бегенди. Бары-ёгы үч йыл мундан өң онуң эҗеси айрылыпды, ол хенизем гам чекйәрди. Инди болса Ысхак Ребеканы сөйүп, багтлы болды.

Барлык 24:1—67.