¿WAN maʼ xa naʼa machunkiluk ja ixuk bʼa dibujo? Sbʼiʼil Rebeca. Jaxa winik maʼ wajum staʼi sbʼiʼil Isaac. Ja yeʼn oj kʼot xcheʼumuk ja Rebeca. ¿Jastal ekʼ ja it?

Ja stat ja Isaac, ja Abrahán, wa skʼana oj staʼ yi jun lekil xcheʼum ja yunini. Ja yeʼn mi skʼana ja yunini anupanuk sok jun ixuk bʼa Canaán yujni ja swinkil ja chonabʼ jaw wa xyaʼteltaye kʼulubʼal dyos. Ja yuj ja Abrahán spaya ja yaʼtumi sok yala yabʼ: «Kaʼax bʼa Harán ja bʼa kulan ja tuk jpamilya sok leʼa jan yi jun xcheʼum ja kunin Isaac».

Anto ja yaʼtum ja Abrahani xchapa lajune kameyo sok stulu yi ja najat bʼejyeli. Yajni mojanxa yiʼoj ja lugar bʼa kulan ja spamilya ja Abrahani, ti jijli bʼa stiʼ jun poso. Ochumxa akʼwal, yajni ja ixuk jumasaʼ ja bʼa chonabʼi waj ya eluke jaʼ bʼa poso. Ja yujil ja yaʼtum ja Abrahán yala yabʼ bʼa orasyon ja Jyoba: «Ja ixuk maʼ oj kalyabʼ oj yaki jaʼ soka kameyoʼiki yeʼn awajuk ja ixuk ja maʼ oja tsaʼ bʼa oj xcheʼumuk ja Isaac».

Tixta eljul ja Rebeca jak yi jaʼ. Yajni ja yaʼtum ja Abrahán skʼana yi jaʼ bʼa oj yuʼ, ja yeʼn yaʼ yi. Anto ja yeʼn waji sok waj ya eljan jitsan jaʼ bʼa oj yuʼ ja kameyoʼiki. Ja yeʼn jel aʼtiji yujni ja kameyoʼiki jel xyuʼaje jaʼ.

Yajni ja Rebeca chʼak yaʼ yi jaʼ ja kameyoʼiki, ja yaʼtum ja Abrahani sjobʼo yi ja Rebeca jas sbʼiʼil ja stati. Chomajkil sjobʼo yi ta wa xbʼobʼ ekʼ yuj ja akʼwal bʼa snaje. Ja Rebeca yala yabʼ: «Ja jtati sbʼiʼil Betuel, sok ay bʼa oj kanan ja bʼa naʼitsi». Ja yaʼtum ja Abrahán wani snaʼa ja Betuel jani ja yunin ja Nacor, ja yijtsʼin ja Abrahán. Ja yuj ti koʼ mekʼana sok yaʼ yi tsʼakatal ja Jyobaji yuj ja tojxta iji och ja bʼa kulan ja spamilya ja Abrahani.

Ja akʼwal jaw ja yaʼtum ja Abrahani xcholo yabʼ ja Betuel sok ja Labani, ja smoj-alijel ja Rebeca, jas yuj jakeli. Ja Betuel soka Labani yalawe ja Rebeca oj bʼobʼ wajuk bʼa oj nupanuk sok ja Isaaki. ¿Yala maʼ oj wajuk ja Rebeca yajni jobʼji yiʼi? Weʼgoni yala oj wajuk. Ja yujil, ela kʼakʼuji kʼeye ja bʼa kameyoʼiki sok kʼe stul-e yi ja najat bʼejyeli bʼa oj kumxuke man Canaán.

Akʼwal xa chʼak kʼotuke. Ja Rebeca yila jun winik wan bʼejyel ekʼ ja bʼa jobʼi. Jaʼa Isaac, sok yajni Isaac yila ja Rebeca jel gustoʼaxi. Ja Isaac jelto snaʼa ja Sara, ja snani, pes oxeto jabʼil chamel sok ja weʼgo jaxa jel kʼe syajtay ja Rebeca, sok cha gustoʼaxi yajkʼachil ekʼele.