БО херээжен кымыл, билир сен бе? Ол Реве́кка-дыр. Ол Исаа́к деп аттыг эр кижиге уткуштур бар чыдар. Реве́кка Исаа́ктың кадайы болур ужурлуг. Ынчалзажок ол канчап ындыг болганыл?

Шак мынчалдыр: Исаа́ктың ачазы, Авраа́м, оглунга эки кадай тып бериксеп турган. Исаа́кты Ханаа́н чериниң херээженнериниң бирээзинге өгленирин ол күзевейн турган, чүге дизе ханаанчылар меге бурганнарга чүдүп турганнар. Ынчангаш Авраа́м чалчазын кыйгыргаш, чугаалаан: ‘Харранда чурттап турар төрелдеримче дедир баргаш, мээң оглум Исаа́кка кадай эккээриңни күзеп тур мен’.

Авраа́мның чалчазы дораан он тевени алгаш, ырак орукче чорупкан. Авраа́мның төрелдери чурттап турар черге четпейн чыткаш, ол кудук чанынга доктаапкан. Кежээки үе чоокшулап орган — бо үеде хоорайның херээженнери кудуктан суглап кээр турган. Ынчангаш Авраа́мның чалчазы Иеговага мөргүп: ‘Сээң Исаа́кка кадай кылдыр шилип бергениң херээжен, меңээ база тевелеримге сугдан узуп берзин’,— дээн.

Удаваанда Реве́кка суглап чедип келген. Чалчаның дилээн дыңнааш, ол аңаа ижер сугну берген. Ооң соонда тевелерге суг узуп берген. Тевелер черле хөй суг ижер болганда, Реве́кка хөй ажылдаар ужурга таварышкан.

Реве́кка ажылын кылып доозуптарга, Авраа́мның чалчазы ооң ачазының адын айтырган. База оларның бажыңынга дүн эрттирип ап болур бе деп, ол айтырган. Реве́кка аңаа харыылаан: ‘Мээң ачамның адын Вафуил дээр, сеңээ хонар чер база тыпты бээр’. Вафуил Авраа́мның дуңмазы Нахорнуң оглу деп, Авраа́мның чалчазы билир турган. Ынчангаш Бурган Авраа́мның төрелдеринге ону чедиргени дээш, Иеговага ол мөгейип, четтиргенин илереткен.

Ол-ла кежээ Авраа́мның чалчазы Вафуилге база Реве́кканың акызы Лаванга, чүге келгенин чугаалаан. Реве́кка ооң-биле кады чорупкаш, Исаа́кка өглениринге олар иелээ чөпшээрешкен. Ынчалза-даа Реве́ккадан айтырарга, ол чүү деп харыылааныл? Ийе — ооң чоруур күзели бар. Дараазында хүнде-ле олар тевелерге олурупкаш, ырак Ханаа́нче дедир чорупкан.

Кежээликтей олар чеде бергеннер. Реве́кка шөлде кылаштап орар эр кижини көрүп каан. Ол Исаа́к болган. Реве́кканы көрүп кааш, ол дыка өөрээн. Чаа-ла үш чыл бурунгаар ооң авазы Са́рра чок апарган, ынчангаш ол ам-даа муңгарап турган. Ынчалза-даа ам Исаа́к Реве́ккага аажок ынакшый бергеш, база катап аас-кежиктиг апарган.