¿MI XA vojtikin li ants liʼ ta lokʼole? Jaʼ sbi Rebeca. Li vinik chbat nupatuk ta bee jaʼ sbi Isaac. Li Rebecae ta xnupun xchiʼuk li Isaaque. ¿Kʼuxi kʼot ta pasel taje?

Veno, ti Abrahame, li stot Isaaque, tskʼan lekil ants sventa chnupun xchiʼuk li skereme. Ti Abrahame mu skʼan ti ta xnupun xchiʼuk junuk ants ta Canaán li Isaaque, yuʼun li antsetik ta Canaane tsmuyubtaik jecheʼ diosetik. Jech oxal ti Abrahame xi la jyalbe li yajtunele: Ta jkʼan cha bat ta Harán ti bu nakal kutsʼ kalaltake te xa sabe tal yajnil li jkerem Isaaque.

Li yajtunel Abrahame lik xchapan lajunkot skameyotak vaʼun lik stam batel sbe. Kʼalal nopol xaʼox xbat ti bu nakal yutsʼ yalaltak Abrahame, li jtunele te paj ta jun poso. Ch-ikʼub xaʼox osil, jaʼo yorail kʼalal chbat slupik tal voʼ ta poso li antsetike. Jech oxal li yajtunel Abrahame la skʼopon Jeova ta orasion, xi la jyale: Ti ants ta slokʼes voʼ kuchʼe xchiʼuk sventa li kameyoetike, jaʼuk ti buchʼu atʼujoj sventa chnupun xchiʼuk li Isaaque.

Vaʼun jaʼo tal saʼ voʼ li Rebecae. Kʼalal la skʼan voʼ yuchʼ li jtunele, li Rebecae la jyakʼbe. Jech noxtok ti Rebecae bat slupilan tal epal voʼ sventa chakʼbe yuchʼ li kameyoetike, yuʼun toj takin yoʼontonik. Toj tsots abtej, yuʼun toj ep tajek ta xuchʼ voʼ li kameyoetike.

Kʼalal laj yoʼonton ti Rebecae, li jtunele la sjakʼbe kʼusi sbi li stote. Xchiʼuk la sjakʼ mi xuʼ xetʼes akʼobal ta snaik. Li Rebecae takʼav: Li jtote jaʼ Betuel, xokol jnakutik sventa xuʼ te xa vay. Li yajtunel Abrahame snaʼoj ti Betuele jaʼ xnichʼon Nacor li xchiʼil ta vokʼel Abrahame. Jaʼ yuʼun la skejan sba xchiʼuk la stojbe ta vokol Jeova ta skoj ti beiltasat batel ta stojolal li yutsʼ yalaltak Abrahame.

Ta akʼobal taje li yajtunel Abrahame la jyalbe Betuel xchiʼuk Labán, li xchiʼil ta vokʼel Rebeca, ti kʼu yuʼun te kʼot ta vulaʼale. Xchaʼvoʼalik la jyalik ti Rebecae xuʼ xchiʼin batel li vinike xchiʼuk ti xuʼ xbat nupunuk xchiʼuk ti Isaaque. ¿Kʼusi la stakʼ Rebeca kʼalal jakʼbate? Tana xi, tskʼan la chbat. Jech oxal ta yokʼomal noʼox la skajlebin skameyoik, vaʼun lik stam batel sbeik sventa chbatik ta Canaán.

Ta smalel kʼakʼal kʼotik. Ti Rebecae la sta ta ilel jun vinik ti yakal chanav ta jamalaltike. Taje jaʼ Isaac. Xmuyubaj tajek kʼalal la jyil ti Rebecae. Li smeʼ Isaaque, li Sarae, jaʼ toʼox lokʼ oxib jabil slajel, jaʼ yuʼun yokel toʼox ta xat-o yoʼonton li Isaaque. Pe ti Isaac ne la skʼan ta sjunul yoʼonton ti Rebecae jech oxal xmuyubaj tajek yoʼonton yan velta.