ANA akummanyilila jwamkongwe jwali paciwuliliju? Lina lyakwe lili Labeka. Soni jwamlume jwakusaka kuwonegana najojo ali Isaki. Jwalakwe caŵe ŵamkwakwe. Ana yeleyi yatendekwe catuli?

Atati ŵakwe Isaki, Abulahamu, ŵasakaga kumpatila mwanagwe jwamkongwe jwambone. Nganasakaga kuti Isaki alombele jwamkongwe jwa ku Kanani, ligongo lyakuti jemanjaji ŵalambilaga milungu jaunami. Sambano Abulahamu ŵam’ŵilasile jwamasengo jwakwe ni kumsalila kuti: ‘Ngusaka kuti mmwejo mjawule kumangwetu kwa acanasi ŵangu, ni mkajigale jwamkongwe jwakuti alombegwe ni mwanangu Isaki.’

Ndaŵi jijojo jwamasengo jwa Abulahamu ŵajigele ngamiya likumi nikuwutanda ulendo wawulewu. Paŵaŵandicile malo gaŵatamaga ŵacinasi ŵa Abulahamu, ŵajimi pacisima. Kwaliji kwigulo, ndaŵi jaŵayikaga acakongwe ŵa mumsinda kukuteka mesi pacisimapo. Sambano jwamasengo jwa Abulahamu jula ŵapelece lipopelo kwa Yehofa, lyakuti; ‘Jwamkongwe jutambe mesi une ni ngamiyasi aŵe jwamsagwile wawojo kuti aŵe jwamkongwe jwa Isaki.’

Pacangakaŵa Labeka ŵakopocele pacisima pala kukuteka mesi. Jwamasengo jula paŵaŵendile mesi gakuti amwe, Labeka ŵampele. Kaneko Labeka ŵapite kukuteka mesi ga ngamiya syosope syanjota sila. Gelego galiji masengo gamakulungwa ligongo ngamiya sikusamwa mesi gamajinji mnope.

Labeka paŵamalisisye kutenda yeleyi, jwamasengo jwa Abulahamu jula ŵam’ŵendile kuti amsalile lina lya atati ŵakwe. Ŵaŵendilesoni kuti naga yili yakomboleka akagone cilo cimo kumangwawo. Labeka ŵajanjile kuti: ‘Atati ŵangu ali Betuwelo, soni kwana malo gakuti mkatame yimpepe ni m’weji.’ Jwamasengo jwa Abulahamu ŵamanyilile kuti Betuwelo ali mwanace jwa mkulugwe Abulahamu lina lyakwe Naholi. Jwamasengo jula ŵatindiŵele pasi ni kumtogolela Yehofa ligongo lyakumlongolela kwa acanasi ŵa Abulahamu.

Cilo celeco jwamasengo jwa Abulahamu ŵamsalile Betuwelo ni Labani mlumbugwawo Labeka, ligongo lyaŵayicile. Wosope ŵajiticisye kuti Labeka komboleka kulongana ni jwamasengojo kuti akalombegwe ni Isaki. Ana Labeka ŵajanjile kuti wuli paŵam’wusisye nganisyo syakwe? Jwalakwe ŵajanjile kuti: ‘Elo.’ Jwalakwe ŵasakaga kwawula. Sambano Lisiku lyakuyicisya ŵakwesile pa ngamiya nikuwutanda ulendo wawulewu kuwujila ku Kanani.

Paŵakopocelaga ku Kanani, kwaliji kwigulo. Labeka ŵam’weni jwamlume ali mkwenda m’migunda. Ŵaliji Isaki. Jwalakwe ŵasangalele kum’wona Labeka. Yaka yitatu yaliji yili yipite ciwile Sala mama ŵakwe, m’yoyo ŵaliji jwacanasape ligongo lya ciwaci. Sambano Isaki ŵamnonyele mnope Labeka, ni ŵaŵelesoni jwakusengwa.