Historia 16

Ti gunaa nachaʼhuiʼ para Isaac

ÑEE racabiaʼluʼ gunaa ni cá lu dibuju riʼ la? Labe Rebeca. Ne hombre ni ziguidxíñabe ca la? láʼ Isaac. Ne laabe nga chiguichaganáʼ Isaac. Ximodo guca ndiʼ yaʼ.

Primé la? Abraham bixhoze Isaac, gucaláʼdxibe ti gunaa nachaʼhuiʼ para xiiñibe. Qué nádibe guichaganáʼ Isaac ne tobi de ca gunaa nuu Canaán, purtiʼ ca binni que runi adorarcaʼ dios ni cadi dxandíʼ. Ngue runi Abraham bicaa ridxi mozo stiʼ ne gúdxibe laa: Racalaʼdxeʼ guibiguetuʼ Harán ra nuu ca binnilidxeʼ ne guyubuʼ ti gunaa para guichaganáʼ Isaac xiiñeʼ.

Oraqueca mozo stiʼ Abraham que gucuaa chii camellu ne guyebe zítupeʼ. Ra ziguidxíñabe ra nabeza ca binnilidxi Abraham la? biaanadxibe ra nuu ti bizé. Maʼ ziguixhinni, ca gunaa de ndaaniʼ guidxi que rindeecaʼ nisa ra bizé. Ngue runi mozo stiʼ Abraham gunábabe Jiobá lu ti oración: Gunaa ni cuee nisa para naa ne ca camellu riʼ nga cuiluʼ para guichaganáʼ Isaac.

Qué nindaa diʼ bedandee Rebeca nisa. Ora gunaba mozo que laabe tuudxi nisa la? laabe bidiibe ni. Óraque laabe guleebe nisa para guiráʼ camellu cayati nisa que. Nadipaʼ dxiiñaʼ bíʼnibe purtiʼ ziaʼ nisa reʼ ca camellu ca.

Biluxe si Rebeca la? mozo stiʼ Abraham gunabadiidxaʼ laabe tu láʼ bixhózebe, laaca gunabadiidxaʼ pa zanda guiaanabe ralídxicaʼ gueelaʼ que. Laabe bicábibe: Bixhozeʼ nga Betuel, ne nuu ra guiaanaluʼ. Mozo stiʼ Abraham nánnabe de que Betuel nga xiiñiʼ Nacor, biʼchiʼ Abraham. Ngue runi bisuxíbibe ne bidiibe xquixe Jiobá pur yené laabe ra nuu ca binnilidxi Abraham.

Gueelaʼ que la? mozo stiʼ Abraham gúdxibe Betuel ne Labán bizaʼnaʼ Rebeca, xi pur guyebe raqué. Guirópacabe guníʼcabe de que Rebeca zanda chiné laabe ne guichaganáʼ Isaac. Xi guníʼ Rebeca ora gúdxicabe laa yaʼ. Guniʼbe de que ziebe. Ngue runi sti dxi queca bireenécabe ca camellu que ne guzácabe zitu sti biaje para yendácabe Canaán.

Maʼ huaxhinni ora guyuucabe. Rebeca biiyabe canazá ti hombre lu layú que, nácasi ni Isaac. Laabe la? biéchebe stale ora biiyabe Rebeca purtiʼ maʼ napa chonna iza de guti jñaabe Sara, ne laabe nuurube triste pur laani. Peru yanna la? Isaac beeda gannaxhiibe Rebeca stálepeʼ, ne guyuube nayecheʼ stiʼ biaje.

Génesis 24:1-67.