UMI mokõi mitãkuimbaʼe rehecháva tuicha idiferénte ojuehegui, ajépa? Ndépa reikuaa mbaʼéichapa héra hikuái? Pe kasadór héra Esaú, ha pe oñangarekóva ovecháre héra Jacob.

Esaú ha Jacob haʼe umi mellíso oguerekovaʼekue Isaac ha Rebeca. Isaac ohayhueterei Esaúpe, pórke haʼe peteĩ kasadór vale oguerúva hiʼupyrã hógape. Péro Rebeca ohayhuve Jacóbpe, pórke ipyʼaguapy ha ipyʼaporã.

Abrahán oikove gueteri, ha ikatu ñapensa mbaʼeichaitépa Jacob ohendusenerakaʼe ijavuélope oñeʼẽ jave Jehovágui. Upéi, Abrahán omano oguerekópe 175 áño, ha umi mellíso upérõ oguereko 15 áño.

Esaú oguerekórõ guare 40 áño omenda mokõi kuña kananéa rehe. Upéva ombyasyeterei Isaac ha Rebeca, pórke koʼã kuña ndoadorái Jehovápe.

Upe rire, peteĩ árape oiko peteĩ mbaʼe ombopochyetereíva Esaúpe iñermáno Jacob ndive. Og̃uahẽ pe tiémpo Isaac omeʼẽ hag̃ua ivendisión itaʼýra ypykuépe. Esaú raẽ onasevaʼekue Jacóbgui, ha upévare haʼe ohaʼarõ oñemeʼẽ chupe ko vendisión. Péro Esaú ovendemavaʼekue Jacóbpe pe vendisión imbaʼerãva. Avei, umi mokõi mitãkuimbaʼe onasérõ guare, Ñandejára heʼimavaʼekue oñemeʼẽtaha Jacóbpe pe vendisión. Ha upeichaite oiko. Isaac omeʼẽ pe vendisión itaʼýra Jacóbpe.

Oikuaávo upéva Esaú, ipochy Jacob ndive. Ipochyetereígui heʼi ojukataha Jacóbpe. Rebeca oikuaávo upéva, ojepyʼapyeterei. Upévare, heʼi Isaácpe: ‘Ndaikatumoʼãi agueropuʼaka Jacob avei omendárõ peteĩ kuña kananéare’.

Upévare Isaac ohenói itaʼýra Jacóbpe ha heʼi chupe: ‘Aníke remenda peteĩ kuña kananéare. Upéva rangue, tereho Haránpe nde avuélo Betuel rógape, ha emenda pe itaʼýra Labán rajy, peteĩvare’.

Jacob iñeʼẽrendu itúvape, ha upe riremínte ojapo pe viáhe puku Haránpe, ihentekuéra oikohápe.