Omapaha nga pangukire mombuniko na movitjitwa
EHUNGI 17
Omapaha nga pangukire mombuniko na movitjitwa
OUZANDONA uvari mbu u ri mba wa panguka tjinene, katjiperi? Omana wawo mo ye tjiwa? Omuyeve o Esau, nu okazandona ku ma ke ṱakamisa ozonḓu o Jakob.
Esau na Jakob va ri ovazandu omapaha vaIsak na Rebeka. Ihe Isak wa suverere Esau tjinene mena rokutja wa ri omuyeve omuwa nu aa eta ovikurya konganda kokutja eṱunḓu ri rye. Nungwari Rebeka wa suverere Jakob tjinene mena rokutja eye wa ri omuzandu omupore nongozu.
Ihe omukururume Abraham ngunda wa ri nomuinyo, nu mena ranao matu yenene okuripura ohunga nomwano Jakob mbwaa tjaterwa indu tji ma puratene eye tjaa hungire ohunga na Jehova. Abraham wa ṱa nozombura 175, indu omapaha tji ya ri nozombura 15.
Indu Esau tja ri nozombura 40 wa kupa ovakazendu vevari okuza kehi raKanaan. Ihi tja hihamisa omitima vya Isak na Rebeka tjinene mena rokutja ovakazendu mba kaave rikotamene ku Jehova.
Eyuva rimwe pa tjitwa otjiṋa tji tja pindikisa Esau tjinene kuna omuangu we Jakob. Oruveze rwa tumbuka ku Isak okusera ondaya komuzandu we otjiveri. Mena rokutja Esau ongwa ri omunene pu Jakob, Esau aa undjire ko okuserwa ondaya ndji. Nungwari Esau kotjirukuru wa randisa ousemba wokuserwa ondaya ku Jakob. Wina, ouzandu uvari mbwi tji wa kwatwa Mukuru wa tja Jakob ongu ma serwa ondaya. Nu ihi otji tja tjitwa. Isak wa sera omuzandu we Jakob ondaya.
Kombunda Esau tja zuva ohunga notjiṋa hi eye wa pindikira Jakob tjinene. Eye wa pindika tjinene nga tja tja ma zepa Jakob. Rebeka tja zuva ohunga notjiṋa hi, eye we rikenda tjinene. Mena ranao wa raera omurumendu we Isak: ‘Matji rire otjiṋa otjihihamise indu Jakob wina tja kupu umwe wovakazendu vaKanaan.’
Okutja Isak opa isanena omuzandu we Jakob ne mu raere kutja: ‘O kupu omukazendu okuza ku Kanaan. Ṱokuyenda konganda ya iho mukururume Betuel ku Haran. Kupa umwe wovasuko womuzandu we Laban.’
Jakob wa puratena ku ihe, nu okuzambo wa uta ouyenda we oure okuyenda ku kwa turire ovazamumwe ve mu Haran.
Genesis 25:5-11, 20-34; 26:34, 35; 27:1-46; 28:1-5; Ovaheberi 12:16, 17.
