Ngewa ya 17: Mavatha Maĩ Kĩvathũkany’o
IMWANA ii ilĩ syĩvaa syĩ kĩvathũkany’o mũno, kana tiw’o? We nĩwĩsĩ masyĩtwa masyo? Ũũ mũsyĩmi nĩ Esaũ, na kĩmwana kĩu kĩũĩthya malondu nĩ Yakovo.
Esaũ na Yakovo maĩ imwana mavatha sya Isaka na Leveka. Ĩthe woo Isaka, nĩwendete Esaũ mũno nũndũ aĩ mũsyĩmi mũseo na nĩwaetae lĩu ũkaĩwa nĩ andũ ma mũsyĩ. Ĩndĩ Leveka endete Yakovo mũno vyũ nũndũ aĩ kĩmwana kĩkilu na kĩuu.
Ũmae woo Avalaamu aĩ o thayũ, na notũtate kũsũnĩa ũndũ Yakovo wendeeaw’a nĩkũmwĩthukĩĩsya aineena ĩũlũ wa Yeova. Ĩtina Avalaamu nĩwakwie e na ũkũũ wa myaka 175, namo mavatha asu maĩ na ũkũũ wa myaka 15.
Esaũ e na ũkũũ wa myaka 40 nĩwatwaie iveti ilĩ sya kuma nthĩ ya Kanaani. Ũndũ ũsu nĩwatumie Isaka na Leveka methĩwa na kyeva kingĩ mũno nũndũ iveti isu iyathaithaa Yeova.
Na ĩndĩ mũthenya ũmwe kweekĩka ũndũ watumie Esaũ amwĩw’ĩa woo mũno mwana-a-inyia wake Yakovo. Ĩvinda nĩyavikie yĩla Isaka waĩ aathime mwana wake ũla mũkũũ. Na nũndũ Esaũ nĩwe waĩ mũkũũ kwĩ Yakovo, Esaũ asũanĩĩa nĩwe ũkũathimwa. Ĩndĩ mbeange Esaũ aĩ anathooesya Yakovo kĩanda kya kwosa ũathimo ũsu. Na ĩngĩ, imwana isu ilĩ iisyawa Ngai nĩwaĩtye kana Yakovo nĩwe ũkosa ũathimo ũsu. Na ũu nĩw’o kweethĩiwe. Isaka aathimie mwana wake Yakovo.
Ĩtina, yĩla Esaũ wamanyie ũvoo ũsu nĩwamũthatĩie Yakovo mũno. Athatie mũno vyũ nginya asya akooaa Yakovo. Yĩla Leveka weewie ũvoo ũsu nĩwakwatiwe nĩ kĩũũyũ kingĩ. Kwoou ĩndĩ amwĩa mũũme wake Isaka: ‘Ũkeethĩwa wĩ ũndũ mũthũku mũno ethĩwa Yakovo o nake akatwaa ũmwe wa aka ma Kanaani.’
Na kwa kĩtumi kĩu Isaka amwĩta Yakovo mwana wake na amwĩa: ‘Ndũkatwae mũndũ mũka wa kuma Kanaani. Vandũ va ũu, ũkĩla ũende kwa Mbethũeli ũmae waku, kũũya Aalani. Ũkatwae ũmwe wa eĩtu ma mwana wake Lavani.’
Yakovo nĩwamwĩthukĩĩisye ĩthe wake, na vate kweteela ambĩĩa kyalo kĩasa kya kũthi kwa andũ ma ũko woo ala mekalaa Aalani.
Mwambĩlĩlyo 25:5-11, 20-34; 26:34, 35; 27:1-46; 28:1-5; Aevelania 12:16, 17.
Makũlyo
- Esaũ na Yakovo maĩ aaũ, namo maĩ na kĩvathũkany’o kyaũ?
- Esaũ na Yakovo maĩ na ũkũũ mwaũ yĩla ũmae woo Avalaamu wakwie?
- Esaũ eekie ũndũ mwaũ ũla watumie inyia na ĩthe wake makwatwa nĩ kyeva kingĩ?
- Nĩ kyaũ kyatumie Esaũ amũthatĩa mũno mwana-a-inyia Yakovo?
- Isaka amwĩaĩie ata mwana wake Yakovo?
Makũlyo ma kwongeleela
- Soma Mwambĩlĩlyo 25:5-11, 20-34.
Yeova athanie ata ĩũlũ wa ana elĩ ma Leveka? (Mwa. 25:23)
Kwaĩ na kĩvathũkany’o kyaũ katĩ wa mwelekelo wa ngoonĩ wa Yakovo na Esaũ ĩũlũ wa ũkithathi? (Mwa. 25:31-34)
- Soma Mwambĩlĩlyo 26:34, 35; 27:1-46; na 28:1-5.
Kũlea kwendeew’a nĩ maũndũ ma kĩveva kwa Esaũ kwoonekie ata ũtheinĩ? (Mwa. 26:34, 35; 27:46)
Isaka amwĩie Yakovo eke ata nĩ kana akwate ũathimo wa Ngai? (Mwa. 28: 1-4)
- Soma Aevelania 12:16, 17.
Ngelekany’o ya Esaũ yoonanisye kyaũ ĩũlũ wa maumĩlĩĩlo ma ala mavũthasya maũndũ matheu?
